Qazaqstanda ǵylymdy qarjylandyrýdyń 5 basym baǵyty bar - Ǵylym komıtetiniń tóraǵasy
ALMATY. 27 qazan. QazAqparat /Erlik Erjanuly/ - Qazaqstan qazir TMD aımaǵynda ǵylymdy qarjylandyrý máselesin sheshken jalǵyz el bolyp otyr.
Bul týraly búgin Almatyda Halyqaralyq ınjenerlik akademııa prezıdentter keńesiniń Qazaqstannyń ǵylymı ınjenerlik qoǵamdastyǵy ókilderimen bolǵan kezdesýi kezinde aıtyldy.
"Qazaqstanda ǵylymdy qarjylandyrýda qazir eń negizgi másele - kim jáne qandaı baǵytta zertteý júrgizetini bolyp otyr. Árbir elde ǵylymdy damytýdyń ózindik basymdyqtary bar. Qazaqstanda búgingi tańda zertteýde 5 basymdyq qabyldandy. Olar - energetıka, shıkizatty tereńdete óńdeý, telekommýnıkatsııalyq tehnologııa, ómir týraly ǵylym jáne eldiń ıntellektýaldyq áleýeti", - deıdi QR Bilim jáne ǵylym mınıstrligi Ǵylym komıtetiniń tóraǵasy Baqtybaı Qasymbekov. Onyń aıtýynsha, Qazaqstan ǵalymdary kez-kelgen eldegi óz áriptesterimen birlesip túrli zertteý jumystaryn júrgizýge múmkindik alyp otyr. Sol sebepti granttyq negizdegi jobalarǵa Halyqaralyq ınjenerlik akademııaǵa múshe bolyp tabylatyn 25 eldiń ulttyq ınjenerlik akademııalary da belsendi qatysa alady.
