Qazaqstanda ǵylymdy qarjylandyrý eki ese artty
Úkimet otyrysynda Premer-Mınıstr ǵylym salasyndaǵy qyzmetkerlerdi kásibı merekesimen quttyqtady.
«Búgin elimiz Ǵylym kúnin atap ótedi. Elimizde otandyq ǵylymdy damytý jolynda eńbek etip júrgen barlyq qyzmetkerlerdi kásibı merekesimen quttyqtaımyn! Sizderge tyń ǵylymı jańalyqtar, jumystaryńyzǵa zor tabys jáne sáttilik tileımin! Búgingi Úkimet otyrysynda otandyq ǵylymdy damytý máselesin qaraımyz», - dedi Álıhan Smaıylov Úkimettiń búgingi otyrysynda.
Onyń aıtýynsha, elimizde sońǵy eki jylda respýblıkalyq bıýdjetten ǵylymdy qarjylandyrý shamamen 2 esege ósip, 84 mlrd teńgeni qurady.
Onyń ústine memlekettik qarjyny ǵylymı jobalarǵa bólý quzyreti ǵalymdardyń ózderine berilgen.
«Qazir qazaqstandyq ǵalymdardyń ǵylymı jumystary kóbeıip keledi. Olardyń zertteý eńbekteri elimizben qatar, shet memleketterde de laıyqty baǵalanyp otyr. Mysaly koronavırýs ınfektsııasyna qarsy óz vaktsınasy bar 6 eldiń qatarynda Qazaqstannyń bolýy otandyq ǵylymnyń áleýeti qanshalyqty zor ekenin kórsetedi. Pandemııa kezinde bul vaktsınany kóptegen azamattarymyz saldyrdy, ol basqa elderge de jiberildi. QazVac-tyń basty artyqshylyǵy – tıimdiligi joǵary, qaýipsiz ári jeńil ótedi. Onyń ústine vaktsına erekshe saqtaý sharttaryn qajet etpeıdi. Biz ǵylymǵa jańa lep ákelgen óz vaktsınamyzdy maqtan tutamyz! Bul – shyn máninde bizdiń ǵalymdarymyzdyń úlken jeńisi!», - dedi Úkimet basshysy.
Óz sózinde Á. Smaıylov otandyq ǵylymnyń halqymyzdyń ómir sapasyn jaqsartýǵa eleýli úles qosýy qajettigin atap ótti.
«Ǵylym salasyndaǵy baǵdarlamalyq qujattardyń barlyǵy osyǵan baǵyttalǵan. Ǵalymdardy qoldaý, ınfraqurylymdy damytý, ǵylymdy vedomstvoaralyq úılestirý jónindegi keshendi sharalar «Tsıfrlandyrý, ǵylym men ınnovatsııalar esebinen tehnologııalyq serpilis» atty ulttyq jobada kózdelgen. Ulttyq jobany iske asyrý ǵalymdar men olardyń ǵylymı jumystarynyń sanyn arttyrýǵa, zertteý ınstıtýttarynyń jabdyqtaryn jańartýǵa múmkindik beredi. Ótken jyldan beri jyl saıyn 500 ǵalym álemniń jetekshi ǵylymı ortalyqtaryna baryp, taǵylymdamadan ótedi», - dedi ol.
Jyl saıyn «Jas ǵalym» jobasy aıasynda 1000 grant bólinedi.
«Biz 2025 jylǵa qaraı ǵylymdy qarjylandyrýda jekemenshik qarjynyń úlesin 50%-ke deıin ulǵaıtýymyz kerek. IT, medıtsınalyq-bıologııalyq salalarda, agroónerkásiptik keshende, «jasyl» tehnologııalarda, taý-ken ǵylymy men metallýrgııada 5 iri ǵylymı-óndiristik ortalyq qurylady. Búgingi tańda óńdeý ónerkásibin damytý men joǵary tehnologııalyq óndiristerdi qurýda ǵylymnyń róli erekshe. Bul eńbek ónimdiligi men halyqtyń tabysyn arttyrýǵa múmkindik beredi», - dedi Álıhan Smaıylov.
