Qazaqstanda ǵylymdy qarjylandyrý birneshe ese artty - Saıasat Nurbek

ASTANA. QazAqparat – Keıingi úsh jylda ǵylymdy qarjylandyrý 3 ese artty. Bul týraly Májiliste ǵylymdy damytý taqyrybyndaǵy Úkimet saǵatynda Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«Memleket basshysynyń saılaýaldy baǵdarlamasynda bergen tapsyrmasyna sáıkes ǵylymdy qarjylandyrýdy kezeń-kezeńimen ulǵaıtý boıynsha maqsatty jumystar eskerilgen. Ǵylymdy qarjylandyrý keıingi úsh jylda 3 esege artty. Bul qarqyn 2021 jyldan bastaldy jáne ony jalǵastyryp kelemiz. 2020 jyly 80,2 mlrd teńge bolsa, bıyl 172,8 mlrd teńge qarastyryldy», - dedi S. Nurbek.

Onyń aıtýynsha, ǵylym salasyna 2024 jyly 247 mlrd teńge, 2025 jyly 243 mlrd teńge bólinedi.

«Sondyqtan, osy qarqynmen jalpy ishki ónimge shaqqandaǵy ǵylymdy qarjylandyrý úlesin kóteremiz. Bul baǵytta Memleket basshysy, Úkimet jaǵynan naqty qoldaý bar», - dedi mınıstr.

Budan bólek, ol ǵylymı jobalardy kommertsııalandyrý qarjysy 4 esege óskenin aıtty. Osy rette 2021 jyly 5,4 mlrd teńge bolsa, 2023 jyly 17,1 mlrd teńgege jetti. Al, 2024 jyly bul kórsetkish 25 mlrd teńge bolady dep josparlanyp otyr.

«Qoldanbaly ǵylymı zertteýlerdi qarjylandyrý 1,6 esege ósti. 2021 jyly 12,8 mlrd teńge bolsa, 2022 jyly - 19,5 mlrd teńge, 2023 jyly 20,8 mlrd teńgege jetti», - dedi vedomstvo basshysy.

Budan buryn habarlanǵandaı, qazirgi kezde elimizde 22 456 ǵylymı kadr bar.

Zertteýshilerdiń 37 paıyzy (2022 jyly – 35%) ǵylymı jáne akademııalyq dárejege ıe. Sondaı-aq, zertteýshilerdiń 34 paıyzy – 35 jasqa deıingi jas ǵalymdar, 43 paıyzy – 35-54 jastaǵylar, 23 paıyzy 55 jastan asqan ǵalymdar.