Qazaqstanda ǵylymdy qarjylandyrý 2015 jyly jalpy ishki ónimniń 1 paıyzyn quraıdy
ALMATY. 27 qazan. QazAqparat /Erlik Erjanuly/ - Qazaqstan aǵymdaǵy jyly ǵylymdy qarjylandyrýǵa 29 mıllıard teńge jumsamaq.
Bul búgin Almatyda Halyqaralyq ınjenerlik akademııa prezıdentter keńesiniń Qazaqstannyń ǵylymı ınjenerlik qoǵamdastyǵy ókilderimen bolǵan kezdesýi kezinde aıtyldy.
QR Bilim jáne ǵylym mınıstrligi Ǵylym komıtetiniń tóraǵasy Baqtybaı Qasymbekovtyń aıtýynsha, aqpan aıynda qabyldanǵan "Ǵylym týraly" jańa zań boıynsha Qazaqstan ǵylymdy basqarýdyń ákimshilik resýrstaryn ǵylym salasynan bóldi. Buryn ýákiletti organdar buryn ózderi baıqaý jarııalap, ony qarjylandyryp kelgen edi. Endi bul sheshimdi ǵalymdardyń ózderi qabyldaıdy. Osy maqsatta Ulttyq ǵylymı keńes quryldy. Oǵan qazaqstandyq jáne sheteldik jetekshi ǵalymdar men bıznes qoǵamdastyqtarynyń jáne memlekettik qyzmet ókilderi enip otyr. Sondaı-aq atalmysh ǵylymı jobalardy qarjylandyrýǵa bola ma, bolmaı ma degen másele táýelsiz saraptamadan keıin ǵana anyqtalady.
"Buryn ǵylymdy "Memlekettik satyp alý týraly" zań boıynsha qarjylandyryp keldik. Onda kim tómen baǵa usynsa, sol tenderde jeńimpaz bolatyn. Endi ǵylymdy qarjylandyrýdyń úsh úlgisin engizdik. Olar - bazalyq, granttyq jáne baǵdarlamalyq maqsatty qarjylandyrý. Byltyr ǵylymdy qarjylandyrýǵa 10 mıllıard teńge bólinse, bıyl ol 29 mıllıardqa deıin jetip otyr. 2012 jyly ol 45 mıllıard teńgeni quraıdy. Al 2015 jyly ony jalpy ishki ónimniń 1 paızyna deıin jetkizemiz. Bul 300 mıllıard teńge", - deıdi Komıtet tóraǵasy.
