Qazaqstanda ǵylymdy damytýǵa qansha qarajat jumsalmaq
«Qazir otandyq ǵylymdy jetildirý máselesine erekshe mán berip otyrmyz. Osy oraıda qarjylandyrý baǵyty da sheshildi. 2023-2025 jyldary, ıaǵnı úsh jylda tek ǵylymdy qarjylandyrýǵa, granttyq qarjylandyrýǵa, baǵdarlamalyq ári tikeleı granttarǵa 650 mıllıard teńgege jýyq qarajat bólindi. 30 jylda mundaı qarjylandyrý bolmaǵan, qazir ǵylymǵa 1,5 mlrd dollardy baǵyttap otyrmyz», - dedi S. Nurbek Qazaqstanda jańartylatyn energııa kózderin damytý konferentsııasynda.
Sonymen qatar mınıstr elimizde ınstıtýtsıonaldyq tetikter qaıta qaralǵanyn, Prezıdent janynan Ǵylym jáne tehnologııalar jónindegi ulttyq keńes qurylǵanyn, «Ǵylym jáne tehnıkalyq saıasat týraly» zań qabyldanatynyn aıtty.
«Bul zań jobasyn qazir tanystyryp jatyrmyz jáne osy qujat qyrkúıek-qazan aılarynda Parlamentke joldanady. Qujat talqylanyp, ony kelesi jyldyń birinshi jartysynda qabyldaýdy josparlap otyrmyz. Onda tıisti tetikter qamtylyp, sonyń ishinde jeke bıznestiń ǵylymı jobalarǵa qatysýyn yntalandyratyn qadamdar qarastyrylady. 150 paıyzǵa deıin salyq jeńildikteri bolady. Bul turǵyda bıznes joǵary tehnologııalyq ónimderdi shyǵarýǵa múddeli bolady. Biz bul mehanızmdi júıeli túrde jasaǵymyz keledi. Sondyqtan qazir osy baǵytta Qarjy mınıstrligimen tıisti talqylaýlardy jalǵastyryp jatyrmyz», - dedi vedomstvo basshysy.