Qazaqstanda ǵylymdy damytýdyń joldary ataldy
«Álbette, ǵylymnyń damýy - kez kelgen qoǵamnyń damýynyń negizgi kórsetkishi. Izraıl, Ońtústik Koreıa elderi tabıǵı resýrstary bolmasa da, ınnovatsııasy men ekonomıkasy jaǵynan álemniń eń ozyq 10 eliniń qatarynan kórinip otyr. Árıne, Qazaqstanda munaı nemese gaz qory mol bolǵanymen, olardyń kúnderdiń kúninde taýsylatynyn bilip otyrmyz. Sondyqtan, Qazaqstan Prezıdenti «Ult jospary: 100 naqty qadam» baǵdarlamasynda, ózge de tapsyrmasynda ınnovatsııaǵa negizdelgen ekonomıkany qurýdy tapsyrdy. Demek, ǵylymnyń damýy birinshi orynǵa shyǵyp otyr», - deıdi ol.
Ǵylym komıteti tóraǵasynyń aıtýynsha, Qazaqstanda ǵylym men ınnovatsııa salasynda áleýet bar.
«Biraq, shynynda da ǵylym ekonomıkaǵa jumys isteýi úshin tyń amaldar kerek. Sol sebepti, dál osy joba (Ónimdi ınnovatsııalardy damytý - avt.) ǵalymdardy ekonomıkaǵa jumyldyrýǵa arnalǵan. Qazirgi tańda ǵalymdardyń jas býynyn daıarlap jatyrmyz. Olar joǵary oqý oryndary men ǴZO bazasynda daıarlanýda. Biz zamanymyzdyń ozyq ǵalymy retinde aǵylshyn tilin meńgergen, birinshi qaınar kózderden ǵylym salasynyń sońǵy jetistikterin baqylap otyra alatyn, zamannyń eń ozyq zertteý tehnologııalaryn meńgergen, sheteldik ǵylymı konferentsııalarda sóz sóıleı alatyn adamdy elestetip otyrmyz. Demek, ǵalym halyqaralyq ǵylymı keńistikke beıimdelgen adam bolýy kerek», - deıdi Bolatbek Ábdirasylov.
Onyń aıtýynsha, Qazaqstanda mundaı ǵalymdar bolǵanymen, elimiz úshin ókinishke oraı, bul baǵytta atqarylǵan eńbekten góri atqaratyn jumystar kóp.
«Qazir mınıstrlikte ǵylymnyń 2025 jylǵa deıingi damý baǵdarlamasy daıarlanýda. Onda biz negizgi baǵyt retinde Qazaqstannyń ǵylymı halyqaralyq konsortsıýmdarǵa jáne ǵylymı ortalyqtarǵa enýin kózdep otyrmyz. Qazirgi ýaqytta biz úshin ondaı ortalyqtar jabyq. Sondaı-aq ǵylymdy aǵylshyn tiline tolyǵymen kóshirýdi josparlap otyrmyz. Óıtkeni, ǵylymdy aǵylshyn tiline aýdaryp alǵan elder alǵa shyǵyp ketken. Qytaıda, Germanııada da osyny baıqaýǵa bolady. Ǵylymnyń tsıfrlandyrylýy, málimetter bazasynyń qurylýy, ǵylymı jobalardy basqarýda kommýnıkatsııalyq tehnologııalardy qoldana otyryp, jobalyq menedjment qurý - osy úsh trend bizdiń ǵylymdy jetekshi orynǵa shyǵarady degen senimdemiz», - deıdi ol.
