Qazaqstanda ǵylym salasyn zaman talabyna sáıkes keltiretin quqyqtyq baza qalyptasty - A. Bıjanov
ASTANA. QazAqparat - Qazaqstanda ǵylymdy kommertsııalandyryp, ekonomıkanyń tetigine aınaldyratyndaı zaman talabyna sáıkes keltiretin tıisti quqyqtyq baza qalyptasty. Búgin Senat komıtetinde «Qazaqstan Respýblıkasy men Halyqaralyq qaıta qurý jáne damý banki arasyndaǵy Qaryz týraly kelisimdi (Ónimdi ınnovatsııalardy yntalandyrý jobasy) ratıfıkatsııalaý týraly» zań jobasyn talqylaý barysynda Áleýmettik-mádenı damý jáne ǵylym komıtetiniń tóraǵasy Ahan Bıjanov osylaı málim etti.
«Biz ótken joly ǵana ǵylym salasyn kommertsııalandyrý týraly zańdy qabyldadyq. Endi halyqaralyq bankpen beriletin qoldaý týraly kelisimdi de qarastyryp jatyrmyz. Osynyń bári elimizdegi ǵylym salasyn odan ári damýyn tolyqqandy qamtıtyny anyq. Endigi kúni ǵylymdy kommertsııalandyrý tetigin qarjylandyrý da qamtamasyz etiledi. Halyqarlyq bank bóletin 88 mln. dollar qarajaty birqatar baǵyttardy qamtıdy. Máselen, birinshi baǵytta 30 mln. dollar shamasyndaǵy qarajat engiziletin jobalardy qarjylandyrady. PhD zertteýlerine de 10 mln. dollar bólinbek. Bul eń aldymen kadr áleýetin kóterýge yqpal etedi. Al ýnıversıtetter men zertteý ınstıtýttary jáne ónerkásiptik nysandar arasynda qurylatyn konsortsıýmdarǵa 30 mln. dollar jumsalmaq», - dedi senator.
Onyń aıtýynsha, barlyq qarajattar elimizdiń ǵylymı áleýetin kóterýge, ǵylymı-tehnıkalyq jobalardy ekonomıkanyń túrli salalaryna engizýge septigin tıgizedi.
«Sondyqtan da, kúrdeli ekonomıkalyq damý kezeńinde halyqaralyq banktiń mundaı qoldaýy Qazaqstan úshin asa ózekti. Bul ǵylymı mańyzy joǵary qoldaý», - dedi A. Bıjanov.
