Elimizde gýmanoıd robottar jasaýǵa arnalǵan jańa tehnologııalyq joba iske qosylady
ASTANA. KAZINFORM – Memleket basshysy aıqyndaǵan strategııalyq baǵyt aıasynda elimizde jasandy ıntellekt salasyndaǵy kadrlyq jáne tehnologııalyq áleýetti damytý boıynsha júıeli jumys júrgizilip keledi, dep habarlaıdy QR Ǵylym jáne ejoǵary bilim mınıstrliginiń baspasóz qyzmeti.
Sonyń ishinde joǵary oqý oryndarynda stýdentterdiń jasandy ıntellekt salasyndaǵy quzyretterin damytýǵa baǵyttalǵan AI-Sana baǵdarlamasy bar.
Osy jumystyń jalǵasy retinde Astanadaǵy Alem.ai alańynda memlekettik organdardyń, joǵary oqý oryndarynyń, tehnologııalyq kompanııalar men sarapshylar qaýymdastyǵynyń ókilderin biriktirgen Qazbot Robotics Forum ótti.
Forým aıasynda Qazaqstanda gýmanoıd robottar óndirisin iske qosý jobasy tanystyryldy. Joba robototehnıka, jasandy ıntellekt jáne ónerkásiptik óndiris baǵyttaryn biriktirip, elimizde ózindik tehnologııalyq jáne ınjenerlik quzyretterdi damytýǵa baǵyttalǵan.
Joba gýmanoıd robottar men Embodied AI salasyndaǵy sheshimderdi ázirleýge jáne óndirýge mamandanǵan halyqaralyq AgiBot tehnologııalyq kompanııasymen birlesip júzege asyrylady. Seriktestik aıasynda tehnologııalardy Qazaqstanda lokalızatsııalaý, ınjenerlik quzyretterdi damytý, ǵylymı zertteýler júrgizý jáne mamandar daıarlaý kózdelgen.
-Bizdiń mindetimiz – daıyn tehnologııalyq sheshimderdi engizýmen ǵana shektelmeı, Qazaqstanda ózimizdiń ınjenerlik jáne ǵylymı quzyretterimizdi qalyptastyrý. Gýmanoıd robottar óndirisi ýnıversıtetter, ǵalymdar men ındýstrııany birtutas tehnologııalyq tizbekke biriktiretin alańǵa aınalýy tıis. Bul – mamandar daıarlaý men ǵylymı zertteýlerden bastap, tehnologııalyq sheshimderdi ázirleý jáne olardy ónerkásipte qoldanýǵa deıingi tolyq tsıkl. Biz bilim, ǵylym jáne óndiristi yqpaldastyrýdyń dál osyndaı modelin keńeıtýdi kózdep otyrmyz, – dedi QR Ǵylym jáne joǵary bilim mınıstri Saıasat Nurbek.
Búginde elimizde jańa tehnologııalyq baǵytty damytýǵa qajetti kadrlyq baza qalyptasyp keledi. Qazaqstandyq joǵary oqý oryndarynda robototehnıka, mehatronıka, ónerkásiptik avtomattandyrý, ıntellektýaldy júıeler jáne jasandy ıntellekt salalary boıynsha 56 bilim berý baǵdarlamasy júzege asyrylady.
Qazaqstandyq joǵary oqý oryndarynyń AgiBot kompanııasymen yntymaqtastyǵy jeke baǵyt retinde damytylady. Yntymaqtastyq ǵalymdar, oqytýshylar men stýdentterdi gýmanoıd robototehnıka jáne jasandy ıntellekt salasyndaǵy zertteýlerge tartýdy, beıindi mamandar daıarlaýdy, sondaı-aq ozyq robototehnıkalyq sheshimderdi Qazaqstan ónerkásibiniń qajettilikterine beıimdeýdi kózdeıdi.
Bul jumysqa Nazarbaev Ýnıversıtetiniń Aqyldy júıeler jáne jasandy ıntellekt ınstıtýty (ISSAI) da qosyldy. Instıtýt gýmanoıd robototehnıka salasyndaǵy quzyretterdi damytý boıynsha ǵylymı jáne júıelik ıntegratsııalyq seriktes retinde jumys júrgizýde.
Forým aıasynda QR Ǵylym jáne joǵary bilim mınıstri Saıasat Nurbek QAZBOT jáne AgiBot basshylyǵymen kezdesti. Taraptar jańa tehnologııalyq baǵyt úshin ınjenerlik kadrlar daıarlaý, beıindi zerthanalar qurý, birlesken ǵylymı zertteýler júrgizý, sondaı-aq stýdentter men ǵalymdardy gýmanoıd robototehnıka salasyndaǵy jobalarǵa tartý máselelerin talqylady.
-Jobany iske asyrý bilim, ǵylym jáne naqty sektor arasyndaǵy ózara baılanysty nyǵaıtyp, Qazaqstanda robototehnıka jáne jasandy ıntellekt salasyndaǵy ózindik ınjenerlik jáne ǵylymı quzyretterdi júıeli damytýǵa negiz qalaıdy,-delingen habarlamada.
Osyǵan deıin Astanada gýmanoıdty robototehnıkaǵa arnalǵan forým ótetinin habarladyq.
