Qazaqstanda Ǵulamalar keńesiniń róli kúsheıtilmek
Memleket pen dinı basqarma arasyndaǵy ózara árekettestikti kúsheıtý maqsatynda 2017 jylǵy 15 aqpanda QR Din isteri jáne azamattyq qoǵam mınıstrligi men Qazaqstan Musylmandary dinı basqarmasy arasynda ózara yntymaqtastyq týraly eki jaqty Kelisimge qol qoıyldy.
Qazaqstan musylmandary dinı basqarmasynyń naıb-mýftıi atalǵan kelisim boıynsha birqatar sharalardyń birlesip júzege asyrylyp jatqandyǵyn atap ótti.
«Atap aıtqanda, birinshiden, Ǵulamalar Keńesiniń rólin kúsheıtý. Keńes tek dinı suraqtardy ǵana emes, sondaı-aq jalpy ómirlik, áleýmettik, mádenı máselelerdiń sheshimderin qabyldaý úshin jan-jaqty talqylaý jumystaryn júrgizýde. Keńestiń quramyna bilikti ımamdar, eldiń tanymal din mamandary men teologtary kiredi», - dedi naıb-mýftı.
Alaý Ádilbaevtyń aıtýynsha, Ǵulamalar keńesiniń quramyna Mınıstrlikke qarasty Mádenıetter men dinderdiń halyqaralyq ortalyǵynyń dırektory A. Abýov qosyldy. Osylaısha, keńes sharǵı úkimderdi shyǵarý barysynda memleketiń din salasyndaǵy baǵytymen úılesimin tabýyna da mán berýde.
Sonymen qatar, qazaq halqy úshin dástúrli Islamnyń negizderin qalyptastyryp, dinı oqý-aǵartý jumysyn jetildirý maqsatynda «Din men dástúr jyly», «Din jáne tarıh taǵylymy jyly», Dinı basqarmanyń jumys barysyndaǵy strategııalyq tórt baǵyty, QMDB-nyń 2020 jylǵa deıingi dinı bilim berýdi damytý Tujyrymdamasy, QMDB-nyń 2020 jylǵa deıingi strategııalyq damý Tujyrymdamasy, «HHІ ǵasyrdyń úzdik zııatker ımamy», «500 úzdik aǵartýshy ımam», QMDB meshitteriniń tártip Erejesi, І, ІІ respýblıkalyq ımamdar forýmy, t.b. jobalar júzege asyryldy.
Sonymen qatar, naıb-múftı qazaqstandyq ıslamtaný mektebin qalyptastyrý maqsatynda «Qazaqstandaǵy ıslamtaný: tarıhy, dástúri, damytý joldary» atty joba daıyndalyp jatqanyn aıtty.
«Bul keshendi ǵylymı jobany júzege asyrýǵa bilikti mamandar tartylatyn bolady. Jobanyń negizgi maqsaty: dástúrli ıslam túsinigi men ulttyq mádenıettiń ózara yqpaldastyǵynyń alatyn ornyn, burynǵy tarıhı kezeńderdegi ulttyq ıdeıanyń qalyptasýy men damýyndaǵy rólin, din qaıratkerleriniń ıdeologııalyq ustanymdarynyń memleketpen ózara baılanysyn jáne dástúrli musylman qazaq qoǵamynyń ulttyq tutastyǵyn qalyptastyrýdaǵy ózindik ornyn anyqtaý bolyp tabylady»,- dedi A.Ádilbaev.
