Qazaqstanda golfty damytý boıynsha memlekettik baǵdarlama ázirlenip jatyr - K. Lıfanov
ALMATY. QazAqparat - Qazaqstanda golfty damytý boıynsha memlekettik baǵdarlama ázirlenip jatyr. Bul týraly «QazAqparat» tilshisine bergen suhbatynda Qazaqstannyń golf federatsııasynyń bas hatshysy Konstantın Lıfanov málim etti.
Onyń aıtýynsha, qazirgi tańda barlyq derlik oblystyq ákimdiktermen óńirlik golf federatsııalaryn qurý týraly kelisimige qol qoıylǵan.
«Bul federatsııalar taıaý ýaqytta jergilikti jalpy bilim beretin orta mektepterde golf boıynsha balalar-jasóspirimder sektsııalaryn ashýmen aınalysady. Onda balalar tegin túrde golftyń qyr-syryn meńgeretin bolady. Qazir Qazaqstanda golfty damytý boıynsha arnaıy memlekettik baǵdarlama ázirlenip jatyr. Barlyq oblystarmen kelisilgen soń, ol kúshine enedi. Sóıtip, Qazaqstannyń Dene shynyqtyrý men sportty damytý baǵdarlamasynyń quramyna enedi» , - dedi K. Lıfanov.
Ol sonymen qatar, bul baǵdarlamanyń qazirdiń ózinde Almatyda ishinara júzege asyrylyp jatqandyǵyn jetkizdi.
«Almatyda bul baǵdarlama «Nurtaý» jáne «Jaılaý» golf-klýbtarynyń bazasynda qolǵa alyndy. Onda balalar tegin jáne aqyly negizde golfty úırenip jatyr. Abonementtik tólem bir aıǵa 16-20 myń teńge. Bul basqa keıbir sport túrlerimen salystyrǵanda qymbat emes», - dedi ol.
Sondaı-aq, onyń aıtýynsha, qazir bul salada kadr daıarlaý máselesi de qarqyndy túrde júrgizilýde.
«Kadrlar aldymen árıne golf-klýbtarda daıarlanady. Keıin belgili bir jetistikke qol jetkizgen soń, jattyqtyrýshy bolǵysy keletin sportshylar Qazaqtyń sport jáne týrızm akademııasynyń golf bólimine oqýǵa túsedi. Qazir bizde birneshe maman osy oqýdy bitirdi. Odan ári bilimin jetildirgisi keletinder shet elderge baryp oqıdy. Sondaı-aq, bizdegi arnaıy oqý baǵdarlamalaryna qatysa alady. Taǵy bir aıta ketetin jáıt, taıaýda «Nurtaý» golf-klýbynda golftan balalar akademııasy qurylady. Ol belgili amerıkalyq maman Devıd Lıdbetterdiń golf akademııasy mártebesine ıe bolady. Bul jergilikti balalar úshin tamasha múmkindik», - dedi Qazaqstan golf federatsııasynyń bas hatshysy.
Aıta ketelik, qazirgi tańda Qazaqstanda jeti golf-klýb jumys isteıdi. Olardyń ekeýi Astanada, úsheýi Almatyda jáne Saryaǵash pen Qostanaı qalalarynda bir-bir golf-klýb ornalasqan. Budan basqa, Talǵar qalasy men Býrabaıda jańadan golf alańdary salynyp jatyr.
