Qazaqstanda GMO ónimderin ósirýge tyıym salynady
ASTANA. QazAqparat - Qazaqstanda aýyl sharýashylyǵy ónimderin shyǵarýda GMO-ny qoldanýǵa tyıym salynady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda Ulttyq agrarlyq ǵylymı-aǵartýshylyq ortalyǵynyń basshysy Asqar Nametov málim etti, dep habarlaıdy QazAqparat.
«Barlyq GMO gıbrıdtermen baılanysty. Álemde gıbrıdter negizinen maıly daqyldylardy ósirýde qoldanylady. Gıbrıdter bizdiń elge 10-15 jyl buryn kelgen jáne bizdiń jaǵdaılarǵa ıkemdele almady. Bizdiń memleket GMO qoldanatyn gıbrıdterge oń kózqaras tanytpaı otyr. Jaqyn jyldary olardy qoldanýǵa tyıym salatyn belgili bir kedergiler, normalar, erejeler engizilýi múmkin», - dep atap ótti ol.
Asqar Nametovtiń aıtýynsha, shet memleketter Qazaqstanda egin sharýashylyǵy hımııalyq qospalarsyz júrgiziletinin biledi. Olar Qazaqstannan organıkalyq taza ónimderdi kútedi, sondyqtan bizdiń elde GMO gıbrıdterin qoldanatyn bolsaq, olar ony qoldamaıdy.
«Sondyqtan bizge birtendep organıkalyq jer jáne mal sharýashylyǵyn damytýǵa kóshý kerek. Qazir standarttar jasaqtalýda. 2017 jyldyń ekinshi jartysynda organıkalyq ónim shyǵarýǵa múmkindik beretin erejeler shyǵýy yqtımal», - dep atap ótti Nametov.
Onyń sózinshe, Aqmola oblysynda birneshe kásiporyn akkredıtatsııadan ótkip úlgerdi, endi olardyń shyǵarǵan taza ónimderi Eýroodaq elderine eksporttalýda.
