Qazaqstanda gıpoallergendi A2 súti óndirisi jolǵa qoıylady

ASTANA. KAZINFORM – «Molkom-Pavlodar» kompanııasy quramynda beta-kazeın A1 aqýyzy joq gıpoallergendi sútti ónerkásiptik kólemde óndiretin Qazaqstandaǵy alǵashqy jelini iske qosatynyn habarlady.

Aýyl sharýashylyǵy mınıstrligi málimetinshe, óndiris Pavlodar oblysynda uıymdastyrylyp, A2 túrindegi sút shyǵarylady. Bul ónim dástúrli sıyr sútine sezimtal adamdar úshin jeńil qorytylatyn ári qaýipsiz dep esepteledi.

Jobanyń júzege asýyna A2A2 genotıpi rastalǵan asyl tuqymdy iri qara maldyń elge ákelinýi negiz boldy. Mundaı sıyrlardan alynǵan súttiń quramynda A1 aqýyzy bolmaıdy.

Kompanııanyń quryltaıshysy Vıacheslav Rýftyń aıtýynsha, gıpoallergendi A2 súti Jańa Zelandııa, Japonııa, Birikken Arab Ámirlikteri, Frantsııa jáne Germanııa sııaqty elderde keńinen óndirilip, joǵary suranysqa ıe. Al TMD elderinde, sonyń ishinde Reseı men Qazaqstanda bul ónim áli de shekteýli túrde usynylyp otyr.

A2 sútiniń basty ereksheligi — onyń quramynda beta-kazeın A1 aqýyzynyń bolmaýy. Bul aqýyz keı adamdar úshin qıyn qorytylyp, jaǵymsyz áser týdyrýy múmkin.

Jańa óndiristik jeliniń iske qosylýy Qazaqstanda gıpoallergendi sút ónimderiniń tolyqqandy sektoryn qalyptastyrýǵa jol ashyp, halyq densaýlyǵyn jaqsartýǵa jáne azyq-túlik qaýipsizdigin arttyrýǵa eleýli úles qosady dep josparlanǵan.

Sút pen sút ónimderiniń aǵzaǵa áseri týraly dıetolog Marına Martasova aıtyp berdi.