Qazaqstanda gıpertonııanyń aldyn alý jónindegi naýqan ótedi
ALMATY. Sáýirdiń 19-y. QazAqparat /Sara Mustafına/ - Qataryna arterııalyq gıpertonııa da kiretin júrek-qan tamyrlary aýrýlary búginde aýrý sany, adam ólimi jáne múgedektikke shaldyǵý sebepteri boıynsha birinshi orynda keledi.
Keıbir málimetter boıynsha ǵalamsharda 1 mıllıardqa jýyq adam arterııalyq gıpertonııamen aýyrady eken. Bul týraly QazAqparat tilshisine Qazaqtyń S.Asfendııarov atyndaǵy Ulttyq medıtsınalyq ýnıversıtetiniń professory Sáýle Qasenova aıtty.
Mamannyń habarlaýynsha, Gıpertonııamen kúresý dúnıejúzilik lıgasynyń bastamashylyǵy boıynsha 2005 jyly mamyrdyń 17-sinde Gıpertonııamen kúresýdiń halyqaralyq kúni belgilengen bolatyn. Bıyl dál osy kúni Qazaqstannyń 16 qalasyndaǵy jetekshi bıznes-ortalyqtarda, emdeý-ambýlatorııalyq mekemelerde, áýejaılar men temirjoldarda (respýblıka boıynsha 200-ge jýyq núktede) kez-kelgen adam óziniń qan qysymyn ólsheı alady. Sondaı-aq, olarǵa arterııalyq gıpertenzııa týraly, aýrýdyń aldyn alýdyń joldary týraly aqparattar beriledi.
Bul naýqannyń maqsaty - arterııalyq gıpertenzııanyń qaýpi týraly, qan qysymyn baqylap otyrýdyń qajettiligi týraly halyqty keńinen habardar etý.
