Qazaqstanda gıperaýqymdy derekter ortalyqtarynyń klasteri iske qosylady
ASTANA.KAZINFORM - Energetıka mınıstrligi Tsıfrlyq damý jáne jasandy ıntellekt mınıstrligimen birlesip Ample Solutions Limited jáne Dominor Partners Ltd. kompanııalarymen yntymaqtastyq týraly memorandýmdarǵa qol qoıǵanyn habarlady.
Memorandýmdar Qazaqstan aýmaǵynda gıpermasshtabty derekter ortalyqtaryn qurý jobalaryn iske asyrýdy, sondaı-aq tsıfrlyq jáne energetıkalyq qýattardyń mamandandyrylǵan klasterin qalyptastyrýdy kózdeıdi.
Jasalǵan kelisimder aıasynda taraptar ilespe energetıkalyq ınfraqurylymdy damytý máseleleri boıynsha ózara is-qımyl jasaıdy. Bul baǵytta gaz, kómir jáne jańartylatyn energııa kózderin (JEK) paıdalana otyryp generatsııalaıtyn qýat kózderin salý arqyly derekter ortalyqtaryn turaqty elektrmen jabdyqtaý qamtamasyz etiledi.
tehJobalardy iske asyrý sheńberinde jabdyqtar men tehnologııalar óndirisin jergiliktendirýge erekshe nazar aýdarylady. Bul eldiń tehnologııalyq táýelsizdigin arttyryp, ónerkásiptik áleýetin damytýǵa qosymsha múmkindikter beredi.
Qol qoıylǵan qujattar tájirıbe jáne tehnologııa almasýdy, kadrlyq áleýetti damytýǵa baǵyttalǵan is-sharalardy, sondaı-aq tsıfrlyq jáne energetıkalyq ınfraqurylym salasyndaǵy birlesken jobalardy, sonyń ishinde Industrial & Digital Energy Hub jobasyn iske asyrý bastamasyn qarastyrady.
Taraptar yntymaqtastyqty odan ári tereńdetýge ózara múddelilik bildirip, qol jetkizilgen kelisimderdi kezeń-kezeńimen iske asyrýǵa daıyn ekendikterin rastady.
Jobalardy iske asyrý ınvestıtsııalar tartýǵa, tsıfrlyq ekonomıkany damytýǵa, jańa jumys oryndaryn qurýǵa, sondaı-aq Qazaqstan Respýblıkasynyń óńirlik tehnologııalyq jáne energetıkalyq hab retindegi pozıtsııasyn nyǵaıtýǵa yqpal etedi.
Aıta keteıik, azyq-túlik baǵasyn endi jasandy ıntellekt baqylaıdy.
