Qazaqstanda ǵylymǵa bólinetin qarjy eki ese artty
ASTANA. KAZINFORM — Sońǵy tórt jyl ishinde Qazaqstan ǵylymı zertteýler men ázirlemelerge bólinetin qarjyny eki ese arttyryp, 468 mln dollarǵa jetkizdi. Bul týraly Eýrazııalyq ekonomıkalyq odaqtyń (EAEO) statıstıkalyq jylnamasynda jarııalanǵan.
Resmı derekterge sáıkes, 2020-2024 jyldary aralyǵynda ǵylymdy qarjylandyrý úzdiksiz ósip keledi. Memleket atalǵan sektorǵa 2020 jyly — 215,6 mln, 2021 jyly — 256,6 mln, 2022 jyly — 264 mln, 2023 jyly — 378 mln dollar jumsaǵan. 2024 jyly shyǵyn 468 mln dollardy quraǵan bolatyn. Aıta keteıik, 2025 jylǵy málimetter tolyq eseptelip bolǵasyn, keıin jarııalanady.
Bul kórsetkish EAEO memleketteri ishindegi eń joǵary deńgeıdiń biri sanalady. Salystyrmaly túrde qarasaq, 2024 jyly odaqqa múshe Armenııanyń ǵylymı zertteýler men ázirlemelerge arnalǵan shyǵyny 68,1 mln dollar bolsa, Qyrǵyzstandiki nebári 9,2 mln dollar shamasynda turaqtady. Elimiz ǵylymı zertteýler men ázirlemelerge bólinetin qarjy kólemi boıynsha Belarýsti (447 mln AQSh dollary) basyp ozyp, EAEO-da ekinshi orynǵa shyqty.
Qazaqstanda ǵylymı zertteýlermen negizinen ýnıversıtetter janyndaǵy ǵylymı ortalyqtar jáne salalyq bilim berý uıymdary aınalysady. Demek, eldegi ǵylymnyń damýy bilim berý salasymen tyǵyz baılanysty ekenin kórsetedi.
Al EAEO-ǵa múshe ózge elderde jaǵdaı ózgeshe. Máselen, Reseı men Belarýsta ǵylymı zertteýlerdi kóbine óndiristik kásiporyndar júrgizedi. Bul elderde ǵylym tikeleı óndiris pen tehnologııalyq damýǵa baǵyttalǵan degen sóz.
Qyrǵyzstan men Armenııada ǵylymı-zertteý jumystary negizinen mınıstrlikterge qarasty uıymdar men memlekettik sektordaǵy mekemelerdiń úlesinde. Munda ǵylymı zertteýler memlekettik basqarý júıesi arqyly júzege asady.
Aıta keteıik, atalǵan málimetter Eýrazııalyq ekonomıkalyq komıssııanyń (EEK) resmı statıstıkasyna negizdelgen.