Elimizde ǵylymdy qarjylandyrý 3,3 esege ósti – Saıasat Nurbek

ASTANA. KAZINFORM – Úkimet Prezıdenttiń ǵylymdy eldiń ekonomıkalyq damýynyń qozǵaýshy kúshine aınaldyrý jónindegi tapsyrmasyn oryndaýda. Osy baǵytta ǵylymı qoǵamdastyqty qoldaý boıynsha júıeli sharalar qabyldanǵan. Bul týraly Ǵylym jáne joǵary bilim mınıstri Saıasat Nurbek málim etti.

Mınıstrdiń aıtýynsha, sońǵy jyldary ǵylymdy qarjylandyrý 3,3 esege ósti. Bul 809 ǵalymdy álemniń jetekshi ǵylymı ortalyqtaryna taǵylymdamaǵa jiberýge jáne materıaldyq-tehnıkalyq bazany keń kólemde jańartýǵa múmkindik berdi.

Ǵylym salasynda tıimdi ekojúıe qurý úshin Memleket basshysynyń janynan Ulttyq Ǵylym akademııasy men Ǵylym jáne tehnologııalar jónindegi Ulttyq keńes quryldy. Sonymen qatar zertteýlerdi ekonomıkanyń praktıkalyq qajettilikterine baǵyttaıtyn «Ǵylym jáne tehnologııalyq saıasat týraly» jańa zań qabyldandy.

Ǵalymdardy tikeleı qoldaý sharalary da qarastyrylǵan: olardyń jalaqysy 18 paıyzǵa ósti, ǵylymı ataqtar úshin beriletin ústemeaqylar ulǵaıdy.

Ǵylym men óndiris baılanysyna erekshe nazar aýdarylyp otyr. Ǵylymı ázirlemelerge ınvestıtsııa salatyn bıznes úshin 150 paıyzdyq salyq shegerimi engizildi. Naqty sektormen birlesken jobalardyń úlesin 2025 jyly 20 paıyzǵa jetkizý mindeti qoıyldy. Bul sharalar ǵylymı jańalyqtardy kommertsııalandyrýǵa jáne Qazaqstannyń tehnologııalyq egemendigin nyǵaıtýǵa baǵyttalǵan.

«Bizdiń barlyq ǵalymdar qazir iri kásiporyndarmen tyǵyz baılanysta jumys isteıdi. Ótken jyly osyndaı toǵyz arnaıy kezdesý ótti, oǵan 400-den astam maman qatysty. Nátıjesinde Qazaqmys, ERG, Qazatomónerkásip, Qarmet, Qazmyrysh sııaqty iri kompanııalardyń mamandarymen birlesip 100-den astam ǵylymı másele ázirlenip, 10 ǵylymı tapsyrma bekitildi», – dedi Saıasat Nurbek.

Aıta keteıik, agrarlyq ǵylym men ınnovatsııaǵa bólinetin qarjy kóbeıip keledi.