Qazaqstanda ǵylymdy damytýdyń 2024-2026 jyldarǵa arnalǵan basym baǵyttary bekitildi
QR Premer-Mınıstri Álıhan Smaıylovtyń tóraǵalyǵymen ótken Joǵary ǵylymı-tehnıkalyq komıssııa otyrysynda ǵylymdy damytýdyń 2024-2026 jyldarǵa arnalǵan basym baǵyttaryn aıqyndaý máselesi qaraldy, dep habarlaıdy QazAqparat Úkimettiń resmı saıtyna silteme jasap.
Otyrysty ashqan Úkimet basshysy kúni keshe ǵana Dúnıejúzilik zııatkerlik menshik uıymy 2023 jylǵa arnalǵan Jahandyq ınnovatsııalyq ındeksti jarııalanǵanyn atap ótti.
Ol ǵylymǵa, bilim berý júıesine jáne ınfraqurylymǵa qatysty 80-ge jýyq kórsetkishti qamtıdy.
«Qazaqstan Úndistan men Irannan keıin Ortalyq jáne Ońtústik Azııa aımaǵy boıynsha úzdik 3 ınnovatsııalyq ekonomıkanyń qataryna endi. Tsıfrlyq damý, ǵylym jáne joǵary bilim mınıstrlikteri elimizdiń halyqaralyq arenadaǵy pozıtsııalaryn jaqsartý úshin ǵalymdarǵa qajetti jaǵdaı jasaý jáne ınfraqurylymdy damytý jumystaryn jalǵastyrýy kerek», — dedi Álıhan Smaıylov.
Vedomstvo basshysy Saıasat Nurbektiń baıandaýynsha, halyqaralyq tájirıbeni, atap aıtqanda, Eýropalyq Odaq elderi, Kanada, Avstralııa, Malaızııa, Ispanııa jáne basqa da memleketterdi, sondaı-aq Memleket basshysynyń halyqqa Joldaýynda jáne basqa da baǵdarlamalyq qujattarda belgilengen strategııalyq mindetterdi eskere otyryp, aldaǵy jyldarǵa arnalǵan ǵylymdy damytýdyń alty basym baǵyty ázirlendi.
Ulttyq qaýipsizdikti qamtamasyz etý baǵyty jeke qarastyrylatyn bolady.
Jalpy, belgilengen basymdyqtar sheńberinde:
sý resýrstaryn utymdy paıdalaný;
topyraq sapasyn saqtaý;
energetıkalyq qaýipsizdikti (sonyń ishinde jylý energııasyn) qamtamasyz etý;
parnıktik gazdar shyǵaryndylaryn azaıtý jáne jańartylatyn kózderdi damytý máselelerine nazar aýdarylady.
Talqylaý jáne daýys berý nátıjeleri boıynsha Joǵary ǵylymı-tehnıkalyq komıssııa atalǵan tásilderdi maquldady.
