Qazaqstanda ǵylym men bıznes tize qosyp jumys isteıtin boldy
ASTANA. KAZINFORM — QR Prezıdenti janyndaǵy QR Ulttyq ǵylym akademııasy jáne «Atameken» ulttyq kásipkerler palatasy ózara túsinistik jáne yntymaqtastyq týraly memorandým bekitti.
Ulttyq ǵylym akademııasynyń prezıdenti Aqylbek Kúrishbaev ǵylymı jobalardy qarjylandyrý jyldan jylǵa artyp, ǵalymdarǵa memlekettik qoldaý kúsheıip kele jatqanyn atap ótti.
«Ǵylymnyń nátıjeliligin arttyrý, ony bıznes-qoǵamdastyqtyń senimdi seriktesi etý mańyzdy. Sondyqtan qazirgi tásilderdi túbegeıli qaıta qarap, otandyq ǵylymdy damytýdyń jańa strategııasyn qurýymyz kerek. Bizdiń basty mindetimiz — ǵylymdy qoldanbaly etý. Bul óndiristi suranysqa ıe ınnovatsııalarmen jasaqtaýǵa jáne eldiń ekonomıkalyq damýynda eleýli serpilis jasaýǵa múmkindik beredi. Bul rette osy ózgeristerdiń barlyǵy ǵylymı qoǵamdastyqtyń ǵana emes, ekonomıkanyń naqty sektorynyń da pikirin eskere otyryp, júzege asyrylýy qajet», — dedi Aqylbek Kúrishbaev elordada ótken dóńgelek ústelde.
Onyń aıtýynsha, Ulttyq ǵylym akademııasy ǵalymdarǵa arnalǵan taǵy bir ákimshilik qurylym bolmaýy kerek. Ol avtonomdy, táýelsiz usynystardy beretin, bedeldi saraptamalyq ǵylymı uıym bolýǵa umtylady.
Akademııa ǵylymdy basqarý salasynda jiberilgen júıelik olqylyqtardyń ornyn toltyrý, forsaıttyq zertteýler men tehnologııalyq boljaý negizinde otandyq bıznespen birge ǵylymı zertteýlerdiń basym baǵyttaryn aıqyndaýdy maqsat etýi qajet.
Sonymen birge, akademııa bes strategııalyq mańyzdy baǵdarlamany ázirleý jumystaryn bastap ketti.
Onyń biri — aýyl sharýashylyǵyndaǵy zamanaýı bıotehnologııany damytý baǵdarlamasy aýyl sharýashylyǵy daqyldarynyń ónimdiligin arttyrýda eleýli serpilis jasaýǵa múmkindik bermek.
Akademııa talantty jastardy ǵylym salasyna tartý ortalyǵyna aınalady.
Bul baǵytta alǵashqy qadamdar jasaldy — akademııa janynan tuńǵysh ret Jas ǵalymdar keńesi quryldy.
A. Kúrishbaev bıznes ókilderine osy bastamany quptaýdy jáne elimizdiń úzdik jas ǵalymdaryn qarjylaı qoldaý qoryn qurýdy usyndy.
Óz kezeginde «Atameken» UKP basqarma tóraǵasy mindetin atqarýshy Raıymbek Batalov palatanyń ekonomıka men qoǵamnyń damýynda sheshýshi ról atqaratyn ǵylym men ınnovatsııany damytýǵa múddeli ekenin jetkizdi.
Ótken jyldyń mamyr aıynda otandyq kásipkerler keńesi ótip, kásipkerler palatasy ǵylymdy damytýdaǵy usynystaryn aıtqan.
«Qazirgi ýaqytta bul usynystardyń bir bóligi „Ǵylym jáne tehnologııalyq saıasat týraly“ jańa zań jobasynda kórinis tapty jáne qabyldandy. Atap aıtqanda, ǵylymǵa qosqan úlesi úshin bızneske salyqtyq jeńildikter berý, jeke sektordy tartý arqyly tehnoparkter, bıznes-ınkýbatorlar, ınnovatsııalyq ortalyqtar qyzmetin kúsheıtý usynystary boldy. Odan bólek, bizdiń palata „Ǵylym qorymen“ birlesip ǵalymdar men kásipkerler úshin birneshe kommertsııalandyrý reaktorlaryn ótkizdi, onda ınnovatsııalyq jobalarmen tanysyp, jobalardy birlesip kommertsııalandyrý týraly kelisimderge qol qoıdy», — dedi Raıymbek Batalov.
Sondaı-aq, ǵylymnyń bıznespen ózara is-qımylyna jaǵdaı jasaý maqsatynda ǵylymı jobalardy kommertsııalandyrýǵa múddeli bıznes ókilderiniń qaýymdastyǵy — Ǵylym qorynyń bıznes-seriktesteri klýby quryldy.
Qazirgi ýaqytta klýbqa 180-nen astam adam múshe.
«Barlyq ótkiziletin is-sharalarymyzdyń basty mindeti — ǵylym men bıznestiń turaqty kooperatsııasyn ázirleý. Ǵalymdar men bıznes bir damý josparymen júrýi kerek. Búgingi memorandým da bizdiń ǵylymı zertteýlerge, ınnovatsııalarǵa jáne damýǵa degen ortaq umtylysymyzdyń sımvoly bolady jáne uıymdarymyz arasyndaǵy seriktestikti nyǵaıtýǵa kúsh salýymyzdyń dáleli bolady», — dedi R. Batalov.
