Qazaqstanda ǵylym qalalary paıda bolady

ASTANA. KAZINFORM – Abaı oblysy (Kýrchatov qalasy) men Almaty oblysynyń (Talǵar aýdany, Túzýsaı aýyly) aýmaǵynda eki ǵylym qalashyǵyn qurý jumystary bastaldy. Bul týraly Ǵylym jáne joǵary bilim vıtse-mınıstri Darhan Ahmed-Zakı málim etti.

- Birinshisi Kýrchatov qalasynda ornalasady, «ǵylym qalasy» mártebesin berýdiń barlyq krıterıılerine sáıkes keledi. Munda ǵylymı uıymdar men joǵary oqý oryndarynyń zııatkerlik áleýeti shoǵyrlanǵan. Qalada taý-ken ónerkásibi men óńdeý salalary alǵa qoıylǵan. Kýrchatovta ulttyq ıadrolyq ortalyǵy men ıadrolyq tehnologııalar parki AQ jumys istep tur, - dedi Darhan Ahmed-Zakı Senat qabyrǵasynda ótken ǵylym qalashyqtaryn damytý máselelerine arnalǵan otyrysta.

Vıtse-mınıstrdiń málimdeýinshe, ekinshi ǵylym qalasy Almaty oblysynyń aýmaǵynda paıda bolady.

- Ekinshi ǵylym qalasy Almaty oblysynda Úlken Almaty aınalma avtomobıl jolyna irgeles ýchaskede qurylady, jaqyn jerde ıadrolyq fızıka ınstıtýty ornalasqan. Sonymen qatar bul jobany iske asyrý Memleket basshysynyń joǵary oqý oryndaryn Almaty qalasynan oblystarǵa kóshirý qajettiligi týraly tapsyrmasyn oryndaýǵa múmkindik beredi. Qazir «Baıserke-Agro» JShS ǵylym qalashyǵynyń aýmaǵy úshin qajetti ınjenerlik ınfraqurylym júrgizýge tehnıkalyq tekserý júrgizip jatyr, - deıdi ol.

Sondaı-aq Darhan Ahmed-Zakı Premer-mınıstrdiń orynbasary Tamara Dúısenovanyń 2024 jylǵy 16 qazandaǵy hattamalyq tapsyrmasy boıynsha bizdiń mınıstrlik ǵylymdy qurý jáne damytý tujyrymdamasynyń jobasy ázirlengenin málim etti.

- Tujyrymdama jobasy 8 bólimnen turady. Onda maqsat, mindetter, aǵymdaǵy jaǵdaıdy taldaý, halyqaralyq tájirıbe, kózqaras taǵy basqa jaıttar kórsetilgen. Kremnıı alqaby (AQSh), Dedek (Ońtústik Koreıa), Tsýkýba (Japonııa) taǵy sol sııaqty ǵylym qalalaryn qurýdyń halyqaralyq tájirıbesi zertteldi, - dep tolyqtyrdy vıtse-mınıstr.

Qazaqstanda ǵylym qalashyǵy qyzmetiniń negizgi baǵyttary:

- agroónerkásiptik keshendi damytý jáne eksport pen azyq-túlik qaýipsizdigin arttyrý úshin ónimdi qaıta óńdeý;

- atom energetıkasy tehnologııalaryn jáne turaqty energetıka úshin jańa materıaldardy engizý, kompozıtter men qorytpalarǵa nazar aýdara otyryp metallýrgııany damytý, vaktsınalar men dári-dármek óndirýge arnalǵan bıotehnologııalar, avtomattandyrý jáne básekege qabilettilik úshin jasandy ıntellektini qoldaný, jasyl ekonomıka úshin jańartylatyn energııa kózderin paıdalaný, sondaı-aq ónerkásipke qajetti jabdyq ázirleý úshin mashına jasaý.

Odan bólek, «Ǵylym qalasy» jobalyq komandasy (Ǵylym jáne joǵary bilim mınıstrligi jobalyq keńsesiniń bazasynda) jáne ǵylym qalasyn damytý máselelerin úılestirý jónindegi jumys toby («Almaty bas jospary» ǵylymı-zertteý ınstıtýty bazasynda) quryldy.

Aıta keteıik, búgin Senattyń Halyqaralyq qatynastar, qorǵanys jáne qaýipsizdik komıtetinde Kýrchatov qalasyn ǵylymı ortalyqqa aınaldyrý máseleleri qaraldy. 

Jıyn barysynda Senat depýtaty Ǵalıasqar Sarybaev ǵylymdy basqarýda áli de bıýrokratııanyń baryn aıtty.