Qazaqstanda gıdrogeldi ne úshin oılap tapty
ASTANA. QazAqparat - Bıologııa ǵylymdarynyń kandıdaty Vıacheslav Ogaı adamnyń tize jáne jambas býyndaryndaǵy osteohondraldi kemistikterdi qaıta qalpyna keltirýge arnalǵan gıdrogel oılap tapty. Gıdrogel ortopedııa men travmotologııada shemirshek jáne súıek tinderin endoprotezdeýmen qatar emdeı alady, dep habarlaıdy QR BǴM Ǵylym komıtetiniń saıty.
Gıdrogel tabıǵı komponentterden turady, jánede quramynda baǵanalyq jasýshalar, hondro- jáne osteoındýktıvti ósý faktorlary bar. Bul ónertabys І jáne ІІ dárejedegi osteohandraldi kemistikterdi emdeýde qoldanylady. Gıdrogeldi paıdalanǵanda adamnyń zaqymdanǵan shemirshek jáne súıek tinderi ota jasalǵan soń úsh nemese odan kóbirek ýaqyt aralyǵynda bastapqy qalpyna qaıta oralyp, jazylady.
«Osteohondraldi kemistikter óte aýyr emdeledi. Naýqastyń sýbhondraldi tilimi jáne shemirshek qabaty búlinedi, árıne, ondaı derti barlar qozǵalǵan kezde qatty aýyrsynýdy sezinedi. Bul jaǵdaıda endoprotezdeý qoldanylady. Ondaıǵa jol bermeý úshin maǵan bıotehnologııalardy qoldaný jáne naýqastyń býyndaryndaǵy shemirshek jáne súıek tinderin tolyqtaı qaıta qalpyna ketiretindeı túrlendirilgen jáne bıoúılesimdi bolatyn gıdrogel jasap shyǵarý oıy keldi», - deıdi Bıotehnologııalar ortalyǵynyń baǵanalyq jasýshalar zerthanasynyń meńgerýshisi V.Ogaı.
V. Ogaı ǵalymdar tobymen birige otyryp, ósý faktorlaryna qajet mólsherdi bilý úshin jáne belgili bir merzimde kemistikterdi joıý úshin qandaı kontsentratsııa kerek ekenin túsiný úshin gıdrogeldiń segiz túrli quram men kontsentratsııasyn paıdalanǵan eken. Olar baǵanaly jasýshalar jáne ósý faktorlarynyń ońtaıly toptamasy bar gıdrogel nusqasyn anyqtaı aldy. Bul nusqaly gıdrogeldi qoldanǵan soń zerthanalyq janýarlardyń tize býyndaryndaǵy osteohondraldi kemistik tolyqtaı jazylyp ketken.
Endoprotezdeý týraly: otadan keıin naýqas sallystyrmaly túrde az aýaqytta aıaǵyna tura alady, alaıda endoprotezdeý kezinde protezdiń jyljyp ketýi, endoprotezdiń bakterııalyq ınfektsııa juqtyryp alýy sekildi belgili-bir keri áserler paıda bolýy múmkin. Protezdiń qyzmet etý ýaqyty 10 jyldy quraıdy, bul mezgil ótken soń ony jańasyna aýystyrý qajet.
Osy sekildi jumystar Izraılde, Gemranııada, Ońtústik Koreıada, AQSh-ta júrgizilip jatyr. Otandyq ónertabystyń tabıǵı quramy biregeı. Sebebi basqa elderde sıntetıkalyq zattar qoldanylady.
«Olar arzan, biraq tabıǵı quramalar anaǵurlym jaqsy. Meıli ol qymbatyraq bolsyn, biraq ol tolyqtaı qalpyna keltirý úshin qajetti nátıje beredi», - deıdi V. Ogaı.
Qazirgi tańda gıdrogel synalyp jatqan barlyq elderde endi qurylý jáne zertteý kezeńinen ótýde.
«Biz qazir klınıka aldyndaǵy zertteýler ótkizdik. Aldaǵy ýaqytta biz granttyq qarjylandyrýdyń kelesi kezeńine tapsyrys berýdi josparlap otyrmyz. Bul zerttemelerimizdi osteohondraldy kemistikteri bar naýqastarǵa qoldanyp kórý úshin», - deıdi ǵylymı jobanyń jetekshisi Vıacheslav Ogaı.
3 jyldan 6 jylǵa deıin ótetin klınıkalyq zertteýlerdi sátti ótkizgen soń biz bul ónertabysymyzdyń qaýipsizdigin, tıimdiligin anyqtaımyz, sonan soń ony tirkep, búkil elimiz boıynsha medıtsınalyq tájirıbege engizýge bolady.
Vıacheslav Ogaıdyń jetekshiligimen jasalǵan «Osteohondraldi kemistikterdi qaıta qalpyna keltirý úshin baǵanaly jasýshalar negizindegi ınektsııalyq gıdrogeldi jasap shyǵarý» jobasy 2015 jyly QR BǴM Ǵylym komıtetinen úsh jylǵa 21 mln teńge grant qarjysyn aldy.
