Qazaqstanda ǵıbadat úılerinen tys jerlerde neke qııýǵa jol berilmeıdi
«Ǵıbadat úılerinen tys jerlerde nekeni qııý nemese toqtatý boıynsha dinı joralar men resimderdi jasaýǵa jol bermeý eskerilgen. Dinı jolmen nekege turýǵa nıet bildirgen adamdardyń bireýi ǵıbadat ǵımaratyna kele almaıtyn jaǵdaıda (aýyr naýqastanýy, múgedektigi, bas bostandyǵynan aıyrý oryndarynda bolýy), bul dinı rásimdi medıtsınalyq nemese ózge de uıymda nekege otyratyn adamdardyń qatysýymen tirkelgen dinı birlestiktiń ókili júrgize alady», - dep toqtaldy mınıstr.
Osy oraıda ol atalǵan talapty buzǵandarǵa aıyppul salynatynyn jetkizdi.
Sonymen qatar, zań jobasy aıasynda shetelderde dinı bilim alý retteletin bolady. Jobaǵa Qazaqstan azamattarynyń shet memleketterde dinı bilim alýyna elimizde joǵarǵy dinı bilim alǵannan keıin ǵana jol beriletini týraly norma engiziledi. Degenmen, halyqaralyq shart negizinde, sondaı-aq tirkelgen dinı birlestikterdiń Qazaqstanda dinı bilim berý uıymdary bolmaǵan jaǵdaıda bul talaptan tys shetelde dinı bilim alýǵa bolady.
«Dinı birlestikterdiń qarjy qyzmetiniń ashyqtyǵyn qamtamasyz etý boıynsha normalar usynyldy. Osy maqsatta jobaǵa olardyń ishki qarjylyq esepterin mindetti túrde júrgizý talaptary engizildi. Osy esepterdi buqaralyq aqparat quraldarynda jyl saıyn jarııalaý kózdelgen. Halyqaralyq tájirıbede bul keńinen qoldanylatyn zańnamalyq talap. Atalǵan másele bizdiń qoǵamda da talaı márte kóterilgen bolatyn», - dedi Darhan Káletaev.
Budan buryn habarlanǵandaı, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Foto: muslim.kz
