Qazaqstanda geotaldaý jasaıtyn zerthanasy bar iri klaster qurylady
ASTANA. KAZINFORM – Memleket basshysynyń tapsyrmasymen Qazaqstanda ulttyq geologııalyq qyzmet bazasynda geotaldaý zerthanasy qurylyp jatyr. Bul týraly ónerkásip jáne qurylys vıtse-mınıstri Iran Sharhan málimdedi.
Onyń aıtýynsha, bul bastama iri geologııalyq klaster qalyptastyrý aıasynda júzege asyrylyp jatyr. Klaster quramyna zerthanamen qatar termosaqtaý qoımasy, mýzeı, sondaı-aq sala mamandarynyń biliktiligin arttyrýǵa arnalǵan oqý synyptary kiredi.
– Qazaqstan aýmaǵyndaǵy geologııalyq barlaýǵa ınvestorlardyń qyzyǵýshylyǵy artyp otyrǵanyn eskersek, zerthanalyq zertteýlerge de suranys artty. Osyǵan baılanysty tıisti ınfraqurylymdy qalyptastyrý boıynsha júıeli jumys júrgizilip keledi, – dedi vıtse-mınıstr elordada Geoscience & Exploration Central Asia halyqaralyq forýmynda.
Vıtse-mınıstr bıyl jobalaý jumystaryna kirisý jáne bolashaq klaster úshin jer ýchaskesin anyqtaý josparlanyp otyrǵanyn aıtty.
Bul rette Ulytaý oblysynda «Qazaqmys» kompanııasy iske asyrǵan zamanaýı zerthanalyq keshen óz jumysyn bastady. Bul nysan qajetti zertteýler júrgizýdi qamtamasyz etedi jáne zamanaýı qaýipsizdik talaptaryna saı keledi.
Sonymen birge, qalalardyń birinde termosaqtaý qoımasy iske qosylyp, óz maqsatyna saı paıdalanylyp jatyr.
Buǵan deıin Iran Sharhan Qazaqstanda qansha paıdaly qazba qory bar ekenin aıtqan edi.
Elimizde geologııalyq barlaýǵa salynǵan ınvestıtsııa kólemi 433 mlrd teńgege jetti.
