Qazaqstanda geoservıster men geoportaldardy jasaý básekelestik ortaǵa beriledi
«Elimizdiń qorǵanysy men áskerimizdiń jaýyngerlik qabiletin qamtamasyz etý qazir kóp jaǵdaıda jańa tehnologııalardy qoldanýǵa baılanysty. Sol sebepti «Tsıfrlyq Qazaqstan» baǵdarlamasyn júzege asyrýǵa qorǵanys salasy da qatysýda. IT-qaýymdastyq, Qorǵanys mınıstrligi, Qorǵanys jáne aeroǵarysh mınıstrliginiń ókilderimen birge ortaq máseleler jóninde pikir almastyq. Bizdiń ustanym anyq - qorǵanys salasyndaǵy mindetterdi iske asyrýǵa qazaqstandyq kompanııalar meılinshe kóbirek aralasýy kerek. Birinshiden, bul - qazaqstandyq ónim. Elbasy munyń mańyzdy ekenin únemi basa aıtady. Ekinshiden, bul - elimizdiń qaýipsizdigi», - dep atap ótedi Asqar Jumaǵalıev.
Vıtse-premer otandyq kompanııalardy qoldaýdy kózdeıtin zańnamaǵa engizý josparlanǵan ózgerister týraly aıtyp bergen.
«Bizdiń mınıstrlik qatań ustanýǵa nıetti Yellow Pages Rules qaǵıdattary týraly da sóz boldy. Máselen, osy jyldyń ózinde geoservıster men geoportaldardy jasaý jónindegi jumystardy básekelestik ortaǵa bermekpiz. Qorǵanys mınıstri aldaǵy ýaqytta trenajerlar, sımýlıatorlar, baılanys, baǵdarlamalyq jáne geoaqparattyq qamtamasyz etý quraldaryn shyǵaratyn qazaqstandyq óndirýshilermen qarym-qatynasty arttyrýǵa qyzyǵýshylyq tanytty», - dedi ol.
Onyń atap ótýinshe, kezdesý qorytyndysy boıynsha Qorǵanys mınıstrligi, Qorǵanys jáne aeroǵarysh mınıstrligi, «Zerde» holdıngi, IT-kompanııalar qaýymdastyǵy jáne «Atameken» palatasy arasyndaǵy memorandýmǵa qol qoıylǵan.
«Qorǵanys mınıstrligine osyndaı kezdesý uıymdastyrǵany úshin alǵys aıtamyn. Bul qorǵanys salasyn tsıfrlandyrýǵa jańa ekpin beredi dep úmittenemin», - dedi Asqar Jumaǵalıev.