Qazaqstanda geologter nege tapshy — sarapshy pikiri

ASTANA. KAZINFORM — Elimizde bilikti geologter joq. Bul týraly «Qazaqstan Munaı servıstik kompanııalarynyń odaǵy» zańdy tulǵalar birlestiginiń tóralqa tóraǵasy Rashıd Jaqsylyqov KazInform aqparattyq agenttigine bergen suhbatynda aıtty.

— Menińshe búkil qazaqstandyqtar Qanysh Sátbaevqa kúni-túni duǵa jasap, alǵys aıtý kerek. Óıtkeni sol kisiniń barlaýynyń arqasynda biz qanshama jer qoınaýlaryn ıelenip qaldyq. Sol kisiniń taýyp bergeniniń arqasynda biz qazir túrli-tústi metall, altyn, munaı, gazdy paıdalanyp otyrmyz. Munyń bári sol kisilerdiń tusynda jasalǵan dúnıe. Egemendik alǵannan beri Qazaqstanda «pah» deıtin birde bir jer qoınaýy ashylǵan joq. Sebebi bizde bilimdi, sapaly geologter taýsylyp qaldy, — deıdi ol.

Rashıd Jaqsylyqov elimizde bilikti geologterdi qalyptastyrý jumystaryn kúsheıtý kerektigin aıtady. Onyń sózinshe memleketke munaı óndirý úshin eshqandaı usynys túsip jatqan joq. Al ondaı usynysty jasaıtyn geolog mamandar tapshy.

— Eski jer qoınaýlary tozyp jatyr. Oǵan dálel 2015-2016 jyldary Qyzylorda oblysy 9,5 mln tonna munaı óndiretin bolsa, qazir 4 mln-ǵa túsip qaldy. Dúnıejúzindegi myqty geologııa ınstıtýttaryn elge tartýymyz kerek. Tipti úlken ulttyq kompanııa qursa da artyq bolmas edi. Sebebi geologter naqty myna jerde qundy qazba-baılyq jatyr demeı, bir de bir ınvestor kelip aqsha salmaıdy ǵoı. Eger elimizde belgili bir sala eshqandaı usynystar jasamaı jatsa, ol salanyń joqtyǵynyń dáleli emes pe, — deıdi R. Jaqsylyqov.

Aıta keteıik, Qazaqstan «Baký-Tbılısı-Djeıhan» qubyry arqyly munaı tasymalyn 2,2 mln tonnaǵa ulǵaıtýdy josparlap otyrǵanyn jazǵan edik.