Qazaqstanda Geologııalyq zertteýler ortalyǵy qurylady - «Qazgeologııa» AQ
ASTANA. 5 sáýir. QazAqparat - Qazaqstanda QR Geologııalyq zertteýler ortalyǵy qurylady, ol memlekettik ozyq geologııalyq ortalyqqa aınalady. Bul týraly búgin «Qazgeologııa» AQ basqarma tóraǵasy mindetin atqarýshy Ǵalym Nurjanov málim etti, dep habarlady primeminister.kz.
«Geologııalyq zertteýler ortalyǵyn qurýdy usyndyq. Oǵan qatysty jumysty biz bastap kettik», - dedi Ǵ.Nurjanov.
Sonymen qatar, ol QR Geologııalyq zertteýler ortalyǵy elimizdiń óndiristik, ǵylymı jáne bilim berý áleýetin irgeli negizde ınnovatsııalyq ıdeıalardyń ozyq tájirıbesin, shet elderdiń mysaldary boıynsha «Qazgeologııa» AQ bazasynda geologııalyq barlaý ádisterin jasaý jáne engizýdiń quzyret ortalyǵy bolady.
Ortalyq qyzmetiniń negizgi baǵyttarynyń biri halyqaralyq standarttar boıynsha geologııalyq-geofızıkalyq, uńǵymalyq jáne geohımııalyq málimetterdi keshendik ınterpretatsııa, biriktirilgen taldaý, paıdaly qazbalardyń boljanatyn resýrstary men qorlaryn kompıýterlik modeldeý jáne baǵalaý bolyp tabylady.
Budan ózge, ortalyq zerthanalyq-taldaý, geohımııalyq zertteýlermen, sonymen qatar pılottyq, tájirıbeli-ónerkásiptik jáne ǵylymı-eksperımenttik jumystarmen aınalysady.
Atap ótken jón, ortalyqta jynys úlgilerin zertteýlerge daıyndaýǵa jáne saqtaýǵa arnalǵan kern qoımasy men paleontologııalyq jáne mıneraldy-petrografııalyq murajaı ornalasady.
Búgingi tańda Nazarbaev Ýnıversıtettiń ortalyqqa arnap jer telimin usynýǵa daıyn ekendigi belgili.
Indýstrııa jáne jańa tehnologııalar vıtse-mınıstri Nurlan Saýranbaev atap ótkendeı, atalǵan «ortalyq zerthanalyq saıabaqtar, murajaılar ornalasqan geologtar qalasy bolmaq, ortalyqtyń tujyrymdamasy osy aıdyń sońyna deıin daıyn bolady».
