Qazaqstanda geologııalyq zertteýlerge jylyna qansha qarjy bólinedi
ASTANA. KAZINFORM – Ónerkásip jáne qurylys mınıstrligi Geologııa komıtetiniń tóraǵasy Erlan Aqbarov elimizdiń mıneraldyq-shıkizat bazasynyń qazirgi jaı-kúıi týraly aıtyp berdi.
«Elimizdiń mıneraldyq-shıkizat bazasynyń qazirgi jaı-kúıine joǵary baǵa berýge bolady. Qazaqstan paıdaly qazbalardyń negizgi túrleri boıynsha álemniń jetekshi elderiniń ondyǵyna kiredi. Otandyq mıneraldy-shıkizat bazasy negizinen otyn-energetıkalyq keshenniń (kómirsýtekter, kómir, ýran), qara, tústi jáne sırek metaldardyń ken oryndarynan turady. Joǵaryda atalǵan paıdaly qazbalar qoryn utymdy paıdalanǵan jaǵdaıda, uzaq ýaqyt boıy eldiń ekonomıkalyq jáne ónerkásiptik damýynyń negizi bolady. ıAǵnı 50 jyldan 100 jylǵa deıin nemese odan da kóp», - dedi Erlan Aqbarov Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, elimizdiń mıneraldyq-shıkizat bazasynyń jaı-kúıi týraly derekter Keńes Odaǵy kezinde qurylǵan ken oryndary qoryna negizdeledi. Búginde memleket esebinde barlyǵy 9177 ken orny bar.
«Geologııalyq barlaýǵa jeke ınvestıtsııalardy tartý jer qoınaýyn geologııalyq zertteýge bólinetin qarjy men onyń tıimdiligine tikeleı baılanysty. Sonyń nátıjesinde jer qoınaýyn barlaýdy júrgizý úshin perspektıvaly aýmaqtar anyqtalady. Jer qoınaýyn memlekettik geologııalyq zertteýdi qarjylandyrý jylyna shamamen 10 mlrd teńgeni quraıdy. Sońǵy 5 jyl ishinde (2018-2023 jyldar) qarjylandyrý somasy shamamen 52 mlrd teńgege jetti. Al jer qoınaýyn paıdalanýdan barlaýǵa salynǵan ınvestıtsııalar kólemi 357 mlrd teńge», - deıdi ol.
