Qazaqstanda geologııalyq zertteý aýmaǵy keńeıedi: 20 joba iske qosyldy
ASTANA. KAZINFORM — Endi Qazaqstanda altyn, mys jáne sırek jer elementterin izdeý kúsheıtiledi, dep habarlaıdy Ónerkásip jáne qurylys mınıstrliginiń baspasóz qyzmeti.
Qazaqstanda aýmaqtyń geologııalyq-geofızıkalyq zerttelý deńgeıin arttyrý boıynsha jumystar jalǵasyp keledi. Memlekettik jer qoınaýyn geologııalyq zertteý aıasynda 1:200 000 masshtabyndaǵy óńirlik zertteýler júrgizilip jatyr.
— 2026 jyldyń sońyna deıin geologııalyq-geofızıkalyq zerttelgen aýmaqty 2,2 mln sharshy km-ge deıin jetkizý josparlanǵan. Sonymen qatar 25 nysandaǵy jumystardy aıaqtaý kózdelgen. Negizgi baǵyttardyń biri — 1:50 000 masshtabyndaǵy geologııalyq túsirilimge — GS-50-ge kóshý. 2026 jyly altyn, mys, polımetaldar, sırek jer elementteri, lıtıı, volfram, molıbden jáne basqa da strategııalyq paıdaly qazbalardyń perspektıvaly ýchaskelerin anyqtaýǵa baǵyttalǵan 20 jobany iske asyrý bastaldy, — delingen mınıstrlik taratqan aqparatta.
Sonymen qatar Soltústik Torǵaı jáne Shý-Sarysý az zerttelgen shógindi basseınderi aýmaǵynda 2D seısmobarlaý jumystarynyń alty jobasyn iske qosý josparlanyp otyr.
2026–2028 jyldary geologııalyq túsirilim jáne seısmobarlaý jumystaryn júrgizýge Úkimet rezervinen 40,7 mlrd teńge bólindi. Onyń ishinde 32,7 mlrd teńge GS-50 jumystaryna, al 8 mlrd teńge seısmobarlaý jumystaryna baǵyttalady.
Jobalar aıasynda aerogeofızıkalyq, geohımııalyq jáne zerthanalyq zertteýler, Jerdi qashyqtan zondtaý derekterin deshıfrleý, burǵylaý jáne uńǵymalardy geofızıkalyq zertteý jumystary júrgiziledi.
Sonymen qatar memlekettik jer qoınaýyn geologııalyq zertteýdi turaqty qarjylandyrýdy qamtamasyz etý maqsatynda aýktsıon qorytyndysy boıynsha alynatyn qol qoıý bonýstary túsimderiniń keminde 50 paıyzyn memlekettik geologııalyq zertteý jumystaryna baǵyttaý zańnamalyq túrde bekitildi.
Osyǵan deıin elimizde 4,6 mıllıonnan astam geologııalyq derek tsıfrlanǵany belgili boldy.
