Qazaqstanda geologııalyq arhıvterdi tsıfrlandyrý tolyq aıaqtaldy
ASTANA. KAZINFORM — Geologııa komıteti geologııalyq qorlarda qaǵaz túrinde saqtalǵan, basymdyqqa ıe bastapqy geologııalyq aqparatty tsıfrlandyrý jumystaryn tolyq aıaqtady.
Ondaǵan jyl boıy júrgizilgen geologııalyq zertteýlerdiń nátıjeleri esepter, kartalar, syzbalar jáne ózge de arhıvtik materıaldar túrinde jınaqtalyp keldi. Bul bastapqy geologııalyq aqparat jer qoınaýyn zertteý, jańa ken oryndaryn izdestirý jáne eldiń mıneraldyq resýrstaryn odan ári ıgerý jónindegi sheshimderdi qabyldaý barysynda keńinen paıdalanylady.
Búgingi tańda josparlanǵan kólem 100% oryndalyp, jalpy sany 4 818 836 materıal tsıfrlyq formatqa kóshirildi. Onyń ishinde:
- 4 304 239 paraq qaǵaz qujat;
- 355 000 grafıkalyq materıal (kartalar, syzbalar jáne syzbalyq qujattar).
Nátıjesinde geologııalyq zertteýlerdiń materıaldaryn, esepterdi, kartografııalyq jáne ózge de arhıvtik qujattardy qamtıtyn basymdyqqa ıe bastapqy geologııalyq aqparattyń biryńǵaı tsıfrlyq qory qalyptastyryldy.
Materıaldardy tsıfrlyq formatqa kóshirý olardy uzaq merzimdi saqtaýǵa múmkindik beredi, muraǵattyq qujattardyń joǵalý jáne búliný qaýpin azaıtady. Sondaı-aq jer qoınaýyn geologııalyq turǵyda zertteý kezinde paıdalanylatyn aqparatty izdeý men óńdeý úderisterin jedeldetedi.
Tsıfrlyq arhıvtiń qurylýy Qazaqstannyń ınvestıtsııalyq tartymdylyǵyn da arttyrady. Investorlar geologııalyq aqparatqa neǵurlym jyldam ári yńǵaıly qol jetkizse, geologııalyq barlaý jumystaryn júrgizý jáne jańa jobalardy iske asyrý jónindegi sheshimder de soǵurlym jedel qabyldanady.
Kelesi kezeńde mátindik materıaldardy avtomatty túrde taný, geologııalyq derekterdiń aýqymdy kólemin taldaý, aqparatty izdeý jáne túrli derekkózder arasyndaǵy ózara baılanystardy anyqtaý úshin jasandy ıntellekt tehnologııalaryn engizý josparlanyp otyr.
Aldaǵy ýaqytta tsıfrlandyrylǵan materıaldar Jer qoınaýyn paıdalanýshylardyń biryńǵaı platformasymen (JQPBP) biriktiriledi. Bul qurylymdalǵan geologııalyq aqparatqa biryńǵaı tsıfrlyq servıs arqyly elektrondyq formatta qol jetkizýge múmkindik beredi.
Atalǵan jobany iske asyrý geologııa salasyn tsıfrlyq turǵydan transformatsııalaýdyń mańyzdy kezeńderiniń biri sanalady. Ol memlekettik geologııalyq aqparattyq resýrstardy basqarý tıimdiligin arttyrýǵa, jer qoınaýyn geologııalyq turǵyda zertteý úderisterin jetildirýge, sondaı-aq ınvestorlardyń, jer qoınaýyn paıdalanýshylardyń jáne sala mamandarynyń geologııalyq mańyzdy derekterge qoljetimdiligin qamtamasyz etýge baǵyttalǵan.
Aıta ketelik 2026–2028 jyldary geologııalyq barlaý jumystaryna $470 mln-ǵa jýyq memleket ınvestıtsııasy salynady.
