Qazaqstanda genetıkalyq túrlendirilgen soıasy óte kóp ónim aınalymnan alynyp tastaldy

ASTANA. QazAqparat - QR DSM Qoǵamdyq densaýlyq saqtaý komıteti quramynda gendik-túrlendirilgen ıngrıdıentter bar ónimderdi anyqtady, dep habarlaıdy QazAqparat.

Qoǵamdyq densaýlyq saqtaý komıteti ónimniń qaýipsizdigine monıtorıng júrgizý barysynda Petropavl qalasyndaǵy «Severnyı» sýpermarketinde (Soltústik Qazaqstan oblysy) baqylaý úshin satyp alǵan ónimniń quramynda genetıkalyq túrlendirilgen soıanyń shamadan tys kóp ekendigin anyqtady. Qaptamada ónimdi daıyndaýshy «Zelenoe selo» (Qytaı) ónimderi JShQ dep kórsetilgen. «Ded Moroz» dep atalatyn ıÝN-N soıa etinde norma boıynsha genetıkalyq túrlendirilgen soıa 0,9% bolýy kerek. Alaıda onda túrlendirilgen soıanyń 2 jelisi (MON 89788 - 8.45% jáne GTS 40-3-2 - 1.77%) shamadan tys artyq bolǵan.

«Tamaq ónimi QHR Chapchal-sıbo avtonomdy ýezinde óndirilgen jáne ákelingen. Bul rette tutyný qaptamasynda kórsetilgen ónimderde gendik-túrlendirilgen ıngrıdıentterdiń quramy týraly aqparat joq.

Osylaısha, atalmysh soıa etin anyqtaý jáne aınalymnan alyp tastaý boıynsha sharalar qabyldanýda», - delingen habarlamada.

Sonymen qatar, komıtettiń barlyq aýmaqtyq organdaryna atalǵan ónimdi anyqtaý jáne aınalymnan alyp tastaý jóninde tapsyrma berildi.

Dúken sórelerinde sáıkes kelmeıtin ónimder anyqtalǵan jaǵdaıda jazbasha nemese 8 [phone]  nómiri boıynsha, sonymen qatar komıtetke  jáne onyń aýmaqtyq departamentterine júginýge bolady (ár óńirdiń baılanys derekteri kooz.dsm.gov.kz saıtynda kórsetilgen).

Aıta keterligi, tamaq ónimderindegi GTO quramynyń ruqsat etilgen normasy 0,9%-dan aspaıdy. Belgilengen talaptarǵa, onyń ishinde Alımentarıýs kodeksiniń halyqaralyq taǵam standarttaryna sáıkes quramynda 0,9%-dan astam GTO bar tamaq ónimi mindetti túrde tańbalanýy tıis.