Qazaqstanda gendik-ınjenerlik qyzmetti paıdalanýdy zańdyq retteý máselesi talqylanýda
ASTANA. 1 shilde. QazAqparat - QR Parlamenti Májilisinde Qazaqstan Respýblıkasyndaǵy gendik-ınjenerlik qyzmetti retteıtin zań jobasy qarastyrylýda,
dep habarlady «Ulttyq bıotehnologııa ortalyǵy» AQ bas dırektory Erlan Ramanqulov pm.kz saıtyna.
«Qazir QR Parlamenti Májilisinde gendik túrlendirilgen organızmder men ónimderdi jasaý, aınalymǵa jiberý jáne tasymaldaýdy retteıtin zań jobasy qarastyrylýda. Jyl ishinde barlyq qajetti kelisýler men talqylaýlar ótkiziledi. Sóıtip, jurtshylyqty, tabıǵat pen ekonomıkany qorǵaıtyn gendik-ınjenerlik konstrýktsııalar men organızmder týraly zań qolymyzǵa tıetin bolady», - dedi E.Ramanqulov.
Sonymen qatar, ol gendik-ınjenerlik qyzmetti paıdalanýdy ár túrli taraptan retteıtin basqa da jekelegen zańdar bar ekenin atap ótti.
«Olardy biryńǵaı konglomeratqa biriktirý qajet. Zańnyń bolmaýy ımporterlerge quramynda gendik-ınjenerlik qyzmet bar ónimder men konstrýktsııalardy qajetti tańbasyz satýǵa jol ashýy múmkin», - dep qosty ortalyq basshysy.
Zań ónimde qajetti tańbanyń bolýyna basa nazar aýdaryp, osyndaı túrdegi barlyq organızmder tizilimderin tirkeý máselesin retteýge múmkindik beretinin basa aıtý qajet. Sonymen qatar, respýblıkada gendik túrgendirilgen organızmderdi retteý jumystary da naqty júrgiziletin bolady.
