Qazaqstanda genderlik teńdiktiń jańa baǵdarlamasy ázirlenedi
ASTANA. QazAqparat - Qazaqstanda genderlik teńdiktiń jańa baǵdarlamasy ázirlenedi. Bul týraly búgin Qazaqstan Respýblıkasynda 2006-2016 jyldarǵa arnalǵan genderlik teńdik strategııasyn iske asyrýdyń aldy ala qorytyndylaryna arnalǵan halyqaralyq konferentsııa barysynda elimizdiń Memlekettik hatshysy Gúlshara Ábdiqalyqova aıtty.
«Bizderge genderlik saıasat boıynsha jańa baǵdarlamalyq qujat ázirleý qajet. Bul qujatta genderlik, otbasylyq-demografııalyq saıasatty júzege asyrý maqsattary, mindetteri, tetikteri men kútiletin nátıjeleri naqty aıqyndalýy tıis. Onda otbasylyq-demografııalyq saıasat boıynsha jeke bólim bolýy tıistigin aıryqsha atap ótim keledi. Búginde Qazaqstan odan ary damýdyń jańa jolyna tústi. Biz «100 naqty qadam» Ult josparyn is júzinde júzege asyrýǵa kiristik. Sondyqtan, menińshe, jańa qujat, jańa ádister respýblıkada búginde júrgizilip jatqan reformalarmen úndes bolýy qajet», - dedi ol.
Aıta keterligi, aǵymdaǵy jyly atalǵan strategııa aıaqtalady. 2006 jyldan beri qoldanysta bolǵan qujattyń arqasynda Qazaqstan eleýli nátıjelerge de qol jetkizdi. Máselen, búginde Parlament Májilisindegi áıelder úlesi 27,1 paıyzǵa jetip otyr. Al bul kórsetkish 2006 jyly 10,4 paıyz bolǵan edi. Sonymen qatar, barlyq deńgeıdegi máslıhattarda áıelder ókildiginiń deńgeıi 2006 jylǵy 16,7 paıyzdan búginde 22,2 paıyzǵa jetti. Birqatar óńirlerde, atap aıtqanda, Pavlodar, Soltústik Qazaqstan jáne Batys Qazaqstan, Aqtóbe, Atyraý oblystarynda jáne Almatyda jergilikti ókiletti organdarda áıelder ókildigi 30 paıyzǵa jetip qaldy. Bul kórsette eń joǵarǵy kórsetkish Qostanaı oblysynda 31,6 paıyz ekendigin atap ótken oryndy.
El ekonomıkasynyń damýyna áıelderdiń qatysý úlesi de artyp keledi. Máselen, 2006 jyldan bastap, bıznestegi áıelder úlesi 38-den 50 paıyzǵa ósken. Jyl saıyn densaýlyq saqtaý salasyndaǵy kórsetkishter de jaqsara túsýde. Ana ólimi 3,7 esege, bala shetineýi 1,5 esege azaıdy.
