Qazaqstanda Genadan basqa eshkim bir aıqastan 40 mln dollar taýyp kórgen joq - Aıdar Mahmetov
ASTANA. QazAqparat - Qazaqstanda birde-bir boksshy nemese sportshy bir aıqastan nemese bir saıystan Gennadıı Golovkındeı aqsha taýyp kórgen joq. Bul týraly QR MMA men pankratıonnan ulttyq quramanyń qurmetti prezıdenti Aıdar Mahmetov osylaı dedi, dep habarlaıdy «QazAqparat» HAA tilshisi.
«Bul aıqas ózinen jas Alvaresten góri Genaǵa asa mańyzdy edi. Óıtkeni, jeńilgen jaǵdaıda sheshim Genany keri ysyryp, osy ýaqytqa deıin jetken jetistikterin joqqa shyǵarar edi. Ózimniń jeke boljamym oryndalǵan joq. Kópshilik arasynda Genanyń tópelegen soqqysyna meksıkalyq shydaı almaı qalady degender de boldy. Biraq, «Kanelo» shydas berýmen birge naǵyz boksshyǵa tán aıqas kórsete bildi. Al Genanyń aıqastyń basynan aıaǵyna deıin joǵary qarqynmen urys salǵany unady. Onyń ekpini turaqty boldy. Qysymdy azaıqan joq», - deıdi ol.
Aıdar Mahmetovtyń aıtýynsha, Golovkın búıirge az soqqy jasaǵan.
«Ádette, biz onyń osy baǵytta jumys isteıtinin, qarsylastary osy shabýylǵa tótep bere almaı qalatynyn kóretinbiz. Dese de, Genaǵa 7:5 esebimen jeńisti berýge bolady. Onyń jeńisi menińshe eshqandaı kúmán týǵyzbaıdy. Onyń ómirindegi eń basty kezdesýi de osy aıqas. Nátıje Genaǵa keri áserin bergen joq. Ol anyq. Ne desek te, ol eliniń maqtanyshy bolyp qaldy. Sarapshylardyń basym bóligi de jeńis Genaǵa tıesili dep otyr. Sondyqtan, revanshty asyǵa kútemiz. Bári jyldam bolmaıdy. Halyqtyń qyzyǵýshylyǵy artpasa tómendemeıdi. Bálkim, oǵan deıin Gena taǵy bir kezdesý ótkizer. Bári de menedjmentke baılanysty», - deıdi ol.
MMA men pankratıon ulttyq quramasy prezıdentiniń sózine súıensek, Genanyń jeńiske jetýine Alvarestiń joǵary sheberligi kedergi keltirgen.
««Kanelonyń» qorǵanystaǵy qabileti joǵary. Genanyń búıirden soqqy jasamaǵanyn aıtyp jatqanymyzben, Alvarestiń oń shyntaǵy búıirin jaýyp turǵanyn umytpaýymyz kerek. Kásibı sport - ol sporttyq elementteri bar shoý. Kásibı boksta qyrýar aqsha tabý kóbinde alǵa shyǵyp ketedi. Kez kelgen kásibı boksshy sharshy alańǵa basyn báıgege tigip shyǵady. Sondyqtan, promoýterden bastap telearnalarǵa deıin bári de kóptep aqsha tabýdyń amalyn qarastyrady. Teń nátıje bul aıqasqa degen qyzyǵýshylyqty arttyra tústi, sebebi halyq kimniń jeńgenin túsinbeı dal. Menińshe, elimizde birde-bir sportshy Genadaı bir aıqastan 40 mln AQSh dollaryn taýyp kórgen joq», - dep túıdi ol.
