Qazaqstanda gematologııa ortalyǵy salynady
ASTANA. QazAqparat - Qazaqstandaǵy tuńǵysh gematologııa ortalyǵy Shyǵys Qazaqstanda salynatyn boldy, dep habarlaıdy «QazAqparat» HAA tilshisi.
«Biz elimizdegi joq gematologııa ortalyǵyn salýdy bastaǵaly otyrmyz. Búgingi tańda bizdiń dárigerler Stenford ýnıversıtetimen ózara seriktestik kelisimge kelý úshin Amerıka Qurama Shtattarynda jumys júrgizip jatyr. Osylaısha, biz óńirimizge ozyq medıtsınalyq tehnologııalardy ákeletin bolamyz», - deıdi OKQ-da ótken baspasóz máslıhaty barysynda Shyǵys Qazaqstan oblysynyń ákimi Danıal Ahmetov.
Óńir ákiminiń aıtýyna qaraǵanda, joba qazirgi ýaqytta júzege asyrý satysynda tur. Jýyq arada memlekettik saraptama jumystary bastalmaq. Nysannyń qurylysy úshin qajetti soma jergilikti bıýdjetke bólinip qoıǵan. Óńir basshysy óz sózinde atalǵan medıtsınalyq nysan elimizdegi osyndaı aýqymdaǵy tuńǵysh mekeme bolatynyn erekshe atap ótti.
«Keńes odaǵy kezinde mundaı ortalyq Mınsk qalasynda ǵana bar bolatyn. Al elimizde birinshi bolyp bizdiń óńir gematologııa ortalyǵy salýdy bastama etti. Tehnologııalar álemniń úzdik tájirıbelerinen kelýi kerek. Biz nysandy turǵyzyp qana qoımaı, mamandarymyzdy oqytatyn sheteldik seriktesterimiz úshin úı turǵyzyp, jaıly jaǵdaı jasaýdy usynys otyrmyz», - deıdi Ahmetov.
