Qazaqstanda gazdyń baǵasy 1 mamyrǵa deıin saqtalady

ASTANA. QazAqparat - 1 mamyrǵa deıin gaz baǵasy qoldanystaǵy deńgeıde saqtalady. Bul týraly búgin Úkimet otyrysynda QR Munaı jáne gaz mınıstri Uzaqbaı Qarabalın málim etti.

Onyń sózine qaraǵanda, munaı-gaz jáne energetıka salasyn damytý boıynsha vedomstvoaralyq komıssııanyń otyrysynda gaz baǵasyn 2014 jylǵy 1 mamyrǵa deıin qoldanystaǵy deńgeıde saqtaý týraly sheshim qabyldandy. Atap aıtqanda 2013 jyldyń deńgeıinde atalǵan merzimge deıin gaz bólý uıymdarymen ishki naryqqa taýarlyq gazdy jetkizý kestesi de saqtalady. U. Qarabalınniń sózine qaraǵanda, qazirgi kezde ishki naryqta taýarlyq jáne suıytylǵan munaı gazyn kóterme satýdyń shekti baǵalaryn aıqyndaý erejesine ózgerister men tolyqtyrýlar engizilip jatyr. «Biz búgin bekitip otyrǵan gaz baǵasyn qalyptastyrý qaǵıdattary gaz baǵasynyń kenetten kóterilýine yqpal etpeýi tıis, ásirese, jylý berý maýsymynyń orta kezinde. Bul nómir birinshi másele. 1 mamyrdan bastap óńirlerde kóterme baǵany qalyptastyrý týraly sheshimdi qabyldasaq ta, degenmen bul máselelerdi jiti baqylaýda ustap otyrý kerek», - dedi Úkimet basshysy Serik Ahmetov. Osy oraıda Premer-Mınıstr óziniń birinshi orynbasary Baqytjan Saǵyntaevqa osy máseleni qadaǵalaýǵa alýdy tapsyrdy.