Qazaqstanda gazdandyrý deńgeıi 64,2% jetti — Jańa ken oryndary ıgeriledi
ASTANA. KAZINFORM — Eldi gazdandyrý deńgeıi 64,2% kórsetti, tabıǵı gaz qoljetimdi halyq sany 13,1 mıllıon adamǵa jetti. Bul týraly Energetıka mınıstri Erlan Aqkenjenov Úkimet otyrysynda aıtty.
Otyrysta ishki naryqty gazben qamtamasyz etý uzaqmerzimdi josparlaý, resýrstyq bazany keńeıtý jáne strategııalyq jobalardy ýaqytyly júzege asyrý qajettigi aıtyldy.
— Memleket basshysy ekonomıkanyń ornyqty damýy úshin zamanaýı energetıkalyq ınfraqurylym, ishki naryqty energııa resýrstarymen senimdi túrde qamtamasyz etý jáne strategııalyq ınvestıtsııalyq jobalardy ýaqtyly júzege asyrý qajet ekenin árdaıym atap kórsetedi. Bul mindetter tolyǵymen gaz salasyna da qatysty. Sebebi ishki tutyný kólemi turaqty túrde ósip keledi. Ótken jyly 20 mlrd tekshe metrge jetti, — dep atap ótti Premer-mınıstr Oljas Bektenov.
Energetıka mınıstri Erlan Aqkenjenov bıyl 24 maýsymda «QR keıbir zańnamalyq aktilerine gazben jabdyqtaý jáne elektr energetıkasy máseleleri boıynsha ózgerister men tolyqtyrýlar engizý týraly» zańǵa qol qoıylǵanyn eske saldy. Eldi gazdandyrý 2035 jylǵa deıingi gazdandyrýdyń bas shemasy sheńberinde júzege asyrylady.
Taýarlyq gazdyń resýrstyq bazasyn ulǵaıtý maqsatynda eki negizgi qujat bekitildi. Olar — QR gaz salasyn damytýdyń 2025-2029 jyldarǵa arnalǵan keshendi jospary jáne 2035 jylǵa deıingi kómirsýtek shıkizatynyń jańa perspektıvaly ken oryndaryn ıgerý jospary.
Atalǵan qujattardyń negizgi maqsaty — munaı men gazdyń jańa ken oryndaryn kezeń-kezeńimen ıgerýdiń tıimdi tetigin qalyptastyrý, kómirsýtek resýrstyq bazasyn turaqty ulǵaıtý jáne ekonomıka men halyqtyń tabıǵı gazǵa ósip otyrǵan qajettiligin qamtamasyz etý.
— Jospar aıasynda 30 jer qoınaýy ýchaskesi qarastyrylǵan. Búgingi tańda QazaqGaz kompanııasymen 9 kelisimshart jasaldy. Onyń ishinde 6 joba barlaý satysynda, al 3 joba óndirý satysynda. 2023-2025 jyldary «QazaqGaz» jáne «QazMunaıGaz» Ulttyq kompanııalarymen Anabaı, Barhannaıa, Rojkovskoe jáne Zapadnaıa Prorva ken oryndary ónerkásiptik ıgerýge engizildi. Sonymen qatar 2027 jyly Zapadnaıa Prorva ken ornynyń ekinshi iske qosý keshenin jáne Maldybaı, Prıdorojnoe, Ýrıhtaý ken oryndaryn paıdalanýǵa berý josparlanyp otyr, — dedi mınıstr.
Aıta keteıik, Úkimet gaz salasyn damytýǵa nazar aýdarmaq.
