Qazaqstanda gazben júretin kólikter sany 44,5% artty
ASTANA. QazAqparat - 2018 jyldyń birinshi jartyjyldyǵynda ІІM organdarynda gaz ballony ornatylǵan 89 592 avtokólik tirkelgen. Bul 2017 jyldyń uqsas merzimimen salystyrǵanda 44,5 % joǵary, dep habarlaıdy QazAqparat tilshisi Qazaqstan avtobıznes qaýymdastyǵynyń baspasóz qyzmetine silteme jasap.
«Bul Qazaqstanda qańtar-maýsym aılarynda tirkelgen barlyq avtokólikterdiń 15,9 % quraıdy», delingen habarlamada.
2018 jyldyń alǵashqy alty aıynda tirkelgen kólikterdiń basym kópshiligi jeke tulǵalarǵa (84 660 birlik) tıesili bolyp shyqty, gaz ballony ornatylǵan kólikterdiń nebári 5,5 % zańdy tulǵalardyń (4 932) menshiginde.
73 008 jeńil kólik tirkelgen, jeńil kommertsııalyq tehnıka - 13 694, aýyr kommertsııalyq tehnıka men avtobýstar, sáıkesinshe - 2273 jáne 617 tirkelimdi quraıdy.
Gazdyń baǵasy eń tómen óńirler arasynda Mańǵystaý oblysy kósh bastap tur (19 525 birlik). Odan keıin Túrkistan oblysy, onyń ishinde Shymkent qalasy keledi (13 875), artynan Aqtóbe oblysy (11 383) jáne Astana qalasy (6 031) tur.
Qańtar aıynyń nátıjeleri boıynsha, Ońtústik Qazaqstan oblysy kólikterge gaz ballonyn ornatý boıynsha alda tur. Bul óńirde 13 018 avtokólik tirkelgen.
