Gaz jelilerin qysqy kezeńge daıyndaý 91%-ǵa oryndaldy - mınıstrlik

«QazaqGaz Aimaq» AQ 2026–2027 jyldardaǵy aldaǵy kúzgi-qysqy kezeńge gaz sharýashylyǵyn keshendi daıyndaýdy jalǵastyrý ústinde. Kompanııanyń jaýapkershilik aımaǵynda 77 myń km gaz taratý jelisi, sondaı-aq olarda ornalasqan gaz sharýashylyǵynyń nysandary men qurylystary bar. Búginde daıyndyqtyń jalpy deńgeıi 91%-dy quraıdy.

Jazǵy kezeńde «QazaqGaz Aimaq» AQ «Intergaz Ortalyq Azııa» AQ, kommýnaldyq qyzmettermen, óńirlerdiń turǵyn úı-kommýnaldyq sharýashylyq basqarmalarymen jáne iri kásiporyndarmen birlesip, tutynýshylardy senimdi, qaýipsiz jáne úzdiksiz gazben qamtamasyz etýge baǵyttalǵan josparly jumystar keshenin júrgizip jatyr.

Jylytý kezeńine daıyndyq aıasynda retteý jáne profılaktıkalyq jumystar oryndalýda. Búginde:

· GRP jáne GRPB-ǵa aǵymdaǵy jóndeý jumystary 92%-ǵa oryndaldy;

· GRPSh jáne ShRP-ǵa aǵymdaǵy jóndeý jumystary – 93%;

· elektrohımııalyq qorǵaý quraldaryna aǵymdaǵy jóndeý jumystary – 93%;

· gaz qubyrlaryna aspaptyq tekserý – 96%;

· ajyratý qurylǵylaryna tehnıkalyq qyzmet kórsetý – 84%.

Bıyl QazaqGaz Aimaq» gaz qysymynyń tómendeý sebepterin joıýǵa jáne gaz taratý jelilerinde apattyq jaǵdaılardyń týyndaý táýekelderin barynsha azaıtýǵa baǵyttalǵan qosymsha is-sharalardy da iske asyryp jatyr.

Barlyǵy 227 osyndaı is-shara kózdelgen, onyń 206-sy nemese 91%-y oryndaldy. Atap aıtqanda:

· gaz qubyrlaryn saqınalaý – 93%;

· qosymsha ShGRP ornatý – 90%;

· ShGRP-daǵy qysym rettegishterin aýystyrý – 90%;

· gaz qubyrlarynyń dıametrin ulǵaıtý – 89%.

Gaz sharýashylyǵyn aldaǵy jylytý maýsymyna daıyndaýǵa 6 306 óndiristik personal qyzmetkeri tartyldy. Kompanııanyń qyzmet kórsetýinde 287 360 GRP, PGB jáne ShGRP birligi bar.

-Júrgizilip jatqan barlyq jumystar qysqy júktemelerdiń eń joǵary kezeńinde tutynýshylardy turaqty, úzdiksiz jáne qaýipsiz gazben qamtamasyz etýge baǵyttalǵan,-delingen habarlamada.

Osyǵan deıin jylytý maýsymyna daıyndyq deńgeıi 57%-ǵa jetkenin jazdyq.