Qazaqstanda gaz tutynýǵa áleýmettik norma engizilýi múmkin
ASTANA. KAZINFORM — Qazaqstanda taýarlyq gazdy tıimdi paıdalaný úshin halyqqa arnalǵan áleýmettik tutyný normalaryn belgileý usynyldy.
Bul týraly Ortalyq kommýnıkatsııalar qyzmetinde ótken baspasóz májilisinde QR Energetıka vıtse-mınıstri Qaıyrhan Tutqyshbaev málimdedi.
Onyń aıtýynsha, Parlament Májilisiniń depýtattary gazben jabdyqtaý jáne elektr energııasy máseleleri boıynsha ózgerister men tolyqtyrýlar engizý týraly zań jobasyna bastamashylyq jasaǵan.
— Zań jobasynda taýarlyq gaz tutynýdy esepke alýdy tsıfrlandyrý, mehanıkalyq eseptegishterden derekterdi qashyqtan beretin «aqyldy» esepteý quraldaryna kóshý qarastyrylǵan. Bul naqty ári dál esep júrgizýge múmkindik beredi, — dedi Qaıyrhan Tutqyshbaev.
Vıtse-mınıstrdiń málimetinshe, qujatta gazdy tıimdi paıdalanýdy yntalandyrý úshin halyqqa taýarlyq gazdy tutynýdyń áleýmettik normalaryn belgileý de kózdelgen.
— Sonymen qatar taýarlyq gazdy únemdi tutynýdy engizý úshin halyq úshin taýarlyq gazdy tutynýdyń áleýmettik normalaryn belgileý usynylady, — dedi ol.
Zań jobasynda gaz taratý uıymdarynyń magıstraldyq gaz qubyrlaryna tikeleı qosylýyna qatysty talaptardy engizý, sondaı-aq gaz salasyndaǵy otandyq óndirýshiler men kadrlyq áleýetti qoldaý sharalary da qamtylǵan.
Qaıyrhan Tutqyshbaevtyń aıtýynsha, atalǵan zań jobasy bıyl 11 maýsymda Parlament Senatynda eki oqylymda qabyldandy. Qazirgi ýaqytta Memleket basshysynyń qol qoıýy kútilýde.
Eske salaıyq, Qazaqstan soltústik óńirlerdi gazdandyrý úshin Reseımen kelissóz júrgizip jatyr.
