Qazaqstanda gaz tapshylyǵyn boldyrmaý úshin qandaı sharalar qabyldanady

NUR-SULTAN. QazAqparat – Gazdyń resýrstyq bazasyn keńeıtýge qatysty yntalandyrý qadamdary kerek. Bul týraly Májilistegi Úkimet saǵatynda QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Jaqyn bolashaqta taýarly gazdyń negizgi óndirýshileri retinde Qashaǵan, Qarashyǵanaq, Teńizshevroıl bolyp qalady, olarǵa taýarly gaz resýrstarynyń jalpy kóleminiń 64 paıyzy tıesili. Óz qurylymy boıynsha Qazaqstanda óndiriletin gaz ilespe munaı gazy bolyp otyr, ol negizinen óńdeýge ınvestıtsııalardy talap etedi», - dedi B. Aqsholaqov.

Onyń paıymynsha, jer qoınaýyn paıdalanýshylardyń resýrstyq bazany keńeıtýge múddeliliginiń tómendigin eskere otyryp, tıisti yntalandyrý sharalary qajet.

«Osyǵan baılanysty, gaz jobalaryna arnalǵan yntalandyrý sharalary arqyly elimizdiń resýrstyq bazasyn tolyqtyrý týraly másele ózekti bolyp tur. Qazirgi ýaqytta resýrstyq bazany keńeıtý úshin Qashaǵan ken ornynda gaz óńdeý zaýytyn úsh kezekpen (1, 2 jáne 6 mlrd tekshe metr) salý boıynsha jumys júrgizilip jatyr. Ol 2030 jylǵa qaraı taýarly gaz kólemin qosymsha 6 mlrd tekshe metrden asyrýǵa múmkindik beredi», - dedi mınıstr.

Osy oraıda ol 2021 jylǵy maýsym aıynan bastap qýaty 1 mlrd tekshe metr bolatyn jobanyń birinshi kezeńi boıynsha qurylys-montajdaý jumystary belsendi túrde júrgizilip jatqanyn aıtty. Birinshi kezeńdi 2024 jyldyń basynda iske qosý eskerilgen.

«Atalǵan zaýytty salý Kashaǵan jobasynyń 2-fazasyn iske asyrý aıasynda pysyqtalyp jatyr. Ol munaı óndirisin táýligine 400 myń berrelden 700 myń barrelge deıin ósirýge múmkindik beredi. Buǵan qosa, mınıstrlik resýrstyq bazany keńeıtýdi yntalandyrý boıynsha jan-jaqty jumys júrgizip jatyr», - dedi vedomstvo basshysy.

Budan buryn habarlanǵandaı, 2025 jylǵa qaraı otandyq gaz tapshylyǵy bolýy múmkin.