Qashaǵan gaz óńdeý zaýyty 2027 jyly iske qosylmaq
ASTANA. KAZINFORM — Prezıdent Qasym-Jomart Toqaev «QazaqGaz» UK» AQ basqarma tóraǵasy Álibek Jamaýovty qabyldady. Memleket basshysyna ulttyq kompanııa qyzmetiniń 2026 jylǵy nátıjeleri jáne aldaǵy jyldarǵa arnalǵan jospary jóninde esep berildi. Bul týraly Aqorda málim etti.
Prezıdentke turǵyndardy jáne el ekonomıkasyn tabıǵı gazben qamtamasyz etý, sondaı-aq QazaqGaz ulttyq kompanııasynyń 2026-2027 jyldardaǵy jylytý maýsymyna tolyq daıyndyǵy týraly málimet usynyldy.
Álibek Jamaýov Memleket basshysynyń geologııalyq barlaý jumystaryn jandandyrý jónindegi tapsyrmasyna sáıkes, Shalqar, Saraljyn, Maldybaı, Soltústik-2, Soltústik-1 jáne Aqqudyq, Prıdorojnoe ýchaskelerinde jumys júrgizilip jatqanyn jetkizdi.
Qasym-Jomart Toqaevqa kompanııanyń iri ınfraqurylymdyq jobalaryn iske asyrý barysy baıandaldy. Qýaty jylyna 1 mıllıard tekshe metr kógildir otyn óńdeýge jetetin Qashaǵan gaz óńdeý zaýytynyń qurylysy jalǵasýda. Óndiris nysanyn paıdalanýǵa berý merzimi 2027 jyldyń ІІІ toqsanyna josparlanǵan. Beıneý — Bozoı — Shymkent magıstraldyq gaz qubyrynyń ekinshi jelisin salý jobasy boıynsha ınjenerlik jobalaý, jabdyqtar men materıaldardy satyp alý jumystary qolǵa alynyp, qurylys-montajdaý kezeńi bastaldy. Jylyna 2,5 mıllıard tekshe metr gaz óńdeýge qaýqarly Qashaǵan gaz óńdeý zaýyty jáne jylyna 5 mıllıard tekshe metr gaz óńdeıtin Qarashyǵanaq gaz óńdeý zaýyty jobalary boıynsha ERS-merdigerler anyqtaldy.
Sondaı-aq «QazaqGaz» UK» AQ basqarma tóraǵasy salaǵa tsıfrlyq sheshimder engizý jóninde aqparat berdi. Aqyl Energy bastamasy aıasynda jasandy ıntellekt pen derekterdi taldaý elementterin qoldana otyryp, gazben jabdyqtaýdy esepke alý jáne basqarý úderisin tsıfrlandyrý júzege asyrylyp jatyr. Gazdy esepke alýǵa arnalǵan 1,3 mıllıonnan astam aspap ıntellektýaldy eseptegishterge kezeń-kezeńimen aýystyrylýda.
Sonymen qatar Memleket basshysy ulttyq kompanııanyń josparymen tanysty. Soǵan sáıkes, soltústik óńirlerge — Kókshetaý jáne Petropavl qalalaryna kógildir otyn jetkizý, gaz-motorly otyn naryǵyn damytý, Rýdnyı qalasynda jylyna 50 myń tonna suıytylǵan tabıǵı gaz óndiretin az tonnaly zaýyt salý, 4-shi jerasty gaz qoımasynyń qurylysyn júrgizý jumystary bastaldy.
Kezdesý sońynda Prezıdent jylytý kezeńinde turǵyndardy jáne ekonomıkany kógildir otynmen turaqty qamtamasyz etý, taýarly gaz qoryn keńeıtý baǵytyndaǵy jumystardy jalǵastyrýdy tapsyrdy.
Aıta keteıik, sońǵy jeti jylda Qazaqstanda 3,6 mln adam tabıǵı gazǵa qol jetkizdi. Osy kezeńde 772 eldi meken gazdandyrylyp, 31,5 myń shaqyrymnan astam gaz jelisi tartyldy. Al 2035 jylǵa qaraı eldegi gazdandyrý deńgeıin 80%-ǵa jetkizý josparlanyp otyr.
