Qazaqstanda gaz ballony jarylysynan qansha adam qaza tapty

NUR-SULTAN. QazAqparat – Elimizdiń áleýmettik ınfraqurylym obektilerinde gaz-aýa qospasynyń tutanýy, turmystyq ballondardyń jarylýy jáne gazben ýlaný boıynsha 55 jaǵdaı tirkelgen. Bul týraly QR Tótenshe jaǵdaılar vıtse-mınıstri Mereke Pishembaev aıtyp berdi, dep habarlaıdy QazAqparat.

«Mınıstrlikke kelip túsken aqparatqa sáıkes, qazirgi ýaqytta elimizdiń áleýmettik ınfraqurylym obektilerinde gaz-aýa qospasynyń tarsyly men tutanýy, turmystyq ballondardyń jarylýy jáne gazben ýlaný boıynsha 55 jaǵdaı tirkelgen (2020 jyly – 67 jaǵdaı), onyń ishinde 33 gaz-aýa qospasy tarsyly, 16 turmystyq ballondardyń jarylýy, 6 gazben ýlaný bar. Barlyǵy 86 adam zardap shekti, onyń ishinde 14 bala bar, 21 adam qaıtys bolsa, onyń ishinde 3 bala bar», - dedi vıtse-mınıstr Ortalyq kommýnıkatsııalar qyzmetinde.

Spıkerdiń aıtýynsha, joǵaryda atalǵan 55 jaǵdaıdyń 36-sy turmystyq ballondardy paıdalanýmen jáne olardyń aqaýymen tikeleı baılanysty.

Sondaı-aq, turmystyq gaz ballondarynyń aınalym tetigin jáne onymen baılanysty protsesterge (maı quıý, tasymaldaý, kóp márte qoldaný jáne esepten shyǵarý) taldaý júrgizilgen.

«Bul taldaý ballondar apatymen baılanysty kóptegen problemalardy kórsetedi, olardyń eń ózektisi mynalar:

- elde halyq paıdalanatyn eski jáne merzimi ótken ballondar kóp, olardy toltyrý zańsyz júrgiziledi;

- ballondar parki eskirgen;

- aınalymdaǵy ballondarǵa esep júrgizilmeıdi;

- ballondardy zańsyz toltyratyn gaz kompanııalary bar;

- ballondardy toltyrý jáne paıdalaný protsesinde qaýipsizdik talaptary elenbeıdi», - dep túsindirdi M. Pishembaev.