Qazaqstanda gaz ballondarynyń qaýipsizdigine qatysty ınspektsııa qurý usynyldy
ASTANA. QazAqparat - Parlament Májilisiniń jalpy otyrysynda depýtat Shavhat Ótemisov qaýipsizdik turǵysynda gazotehnıkalyq ınspektsııalardy qurýdy surady, dep habarlaıdy QazAqparat.
«Qazirgi ýaqytta Qazaqstan Respýblıkasy Parlamentiniń Májilisinde Parlament depýtattary bastamashylyq jasaǵan «Gaz jáne gazben jabdyqtaý týraly» QR Zańyna ózgerister men tolyqtyrýlar engizý týraly» zań jobasy qaralýda. Atalǵan zań jobasymen jumys barysynda gazben jabdyqtaý júıesi nysandarynyń qaýipsiz paıdalanylýyn qamtamasyz etý máseleleri gaz naryǵy sýbektileriniń úlken alańdaýshylyǵyn týǵyzyp otyr. 2014 jyly ónerkásiptik qaýipsizdik salasyndaǵy ýákiletti organnyń turmystyq ballondar men gazben jabdyqtaý júıeleri nysandaryn qaýipsiz paıdalaný talaptarynyń saqtalýyna baqylaý júrgizý jónindegi quzyreti alyp tastalǵan bolatyn. Osynyń saldarynan gaz naryǵy sýbektileriniń qaýipsizdik talaptaryn saqtaýyna baqylaý júrgizý múldem joǵaltyldy. Tek sońǵy bir jylda Qazaqstanda gaz ballondary jarylýynyń 91 jaǵdaıy oryn alǵan, onyń barysynda 9 adam qaza taýyp, 100 adam zardap shekken», - dep atap ótti depýtat Úkimet basshysy Baqytjan Saǵyntaevtyń atyna joldaǵan saýalynda.
Onyń sózine qaraǵanda, qazirgi ýaqytta Úkimet gazben jabdyqtaý júıeleriniń obektilerin qaýipsiz paıdalaný máselesin sheshý úshin tıisinshe ókilettikterdi turǵyn úı ınspektsııalaryna júkteýdi josparlap otyr.
«Turǵyn úı ınspektsııalarynyń ókilettikteri gaz qubyrlary, gaz toltyrý pýnkti jáne avtogaz quıý stansysy sııaqty obektilerge jetkilikti bolmaıtyny sózsiz. ıAǵnı, problema ishinara sheshiletin bolady jáne azamattar úshin alǵashqy qaýip kózderi nazardan tys qalady. Osyǵan baılanysty, Baqytjan Ábdiruly (Úkimet basshysy), ónerkásiptik qaýipsizdik salasyndaǵy ýákiletti organnyń, bolmasa jergilikti atqarýshy organdardyń janynan gazotehnıkalyq ınspektsııalardy qurýǵa baǵyttalǵan jedel sharalar qabyldaý qajet. Bul qurylym turmystyq ballondardy jáne gazben jabdyqtaý júıeleriniń nysandaryn qaýipsiz paıdalaný talaptarynyń saqtalýyna baqylaýdy júzege asyratyn bolady», - dedi Sh. Ótemisov.
