Qazaqstanda gaz baǵasyn retteıtin tıisti norma engizilmek

ASTANA. QazAqparat – QR Energetıka mınıstriniń mindetin atqarýshy Bolat Aqsholaqov turǵyn úılerinde gazdy únemdemeı jaǵatyndar úshin otyn quny basqasha esepteletinin aıtty, dep habarlaıdy QazAqparat tilshisi.

«Memleket basshysy gazǵa qatysty aıtqan sózinde el halqy únemdep úırenýi kerek ekenin aıtty», - dedi B. Aqsholaqov Ortalyq kommýnıkatsııalar qyzmetindegi baspasóz máslıhatynda.

Onyń atýynsha, bul turǵyda gaz baǵasy barlyq tutynýshyǵa birdeı kóteriledi degendi bildirmeıdi.

«Osy oraıda jaǵylatyn gazdyń tıisti normasy engizilýi múmkin. Bul rette ár adamǵa qatysty nemese baspananyń sharshy metrine qaraı tutyný normasy bolady», - dedi mınıstrdiń mindetin atqarýshy.

Onyń sózine qaraǵanda, qazir bul baǵytta tıisti esepteýler júrip jatyr.

«Eger turǵynnyń jaqqan gaz kólemi tıisti normadan aıtarlyqtaı asyp tússe, tıisti esep-qısap eskerilmek. ıAǵnı, gazdy únemdemese nemese turǵyn úıge kommertsııalyq nysandardy - meıramhanalardy, ashanalardy qosyp, olardy arzan tarıfpen jylytsa, bul da durys emes. Sondyqtan adamǵa qajet kólemdi eskere otyryp, sol kólemde jaǵylǵan gazdyń baǵasy turaqty bolady. Al tıisti deńgeıden asqan jaǵdaıda, baǵa ósedi», - dedi Bolat Aqsholaqov.

Budan buryn habarlanǵandaı, jaqynda Memleket basshysy Qasym-Jomart Toqaev záýlim úıin tómen tarıfpen jylytatyndar úshin gazdyń tekshe metri qymbatyraq bolýy tıis ekenin aıtty.