Qazaqstanda gaz baǵasy qymbattamaıdy

NUR-SULTAN. QazAqparat - 2021 jyldyń 1-toqsanynda suıytylǵan munaı gazynyń shekti kóterme baǵasy qazirgi baǵa deńgeıinde qalady. Bul týraly QR Energetıka mınıstrliginen málim etti, dep habarlaıdy QazAqparat tilshisi.

«Gaz jáne gazben jabdyqtaý týraly» QR Zańyna sáıkes Qazaqstan Respýblıkasynyń ishki naryǵyna suıytylǵan munaı gazyn jetkizý jospary aıasynda elektrondyq saýda alańdarynan tys ótkiziletin suıytylǵan munaı gazynyń shekti baǵasyn memlekettik retteý júzege asyrylady. Energetıka mınıstrligi shekti baǵany Ulttyq ekonomıka mınıstrligimen kelisim boıynsha toqsan saıyn bekitedi jáne ol Qazaqstan Respýblıkasynyń búkil aýmaǵynda qoldanylady. Osyǵan oraı Energetıka mınıstriniń buıryǵymen 2021 jyldyń 1-toqsanyna arnalǵan shekti kóterme baǵa bekitildi.

«Shekti baǵany belgileý tártibi Qazaqstan Respýblıkasynyń ishki naryǵynda taýarlyq gazdy kóterme saýdada ótkizýdiń shekti baǵalaryn jáne Qazaqstan Respýblıkasynyń ishki naryǵyna suıytylǵan munaı gazyn elektrondyq saýda alańdarynan tys jetkizý jospary aıasynda ótkiziletin suıytylǵan munaı gazynyń shekti baǵalaryn aıqyndaý qaǵıdalarymen reglamenttelgen. Osy qaǵıdalarǵa sáıkes 2021 jylǵy 1-toqsanǵa arnalǵan shekti baǵa 2020 jylǵy tórtinshi toqsandaǵydaı QQS-ty esepke almaǵanda tonnasyna 38 701,67 teńgeni qurady», - delingen mınıstrlik aqparatynda.