Qazaqstanda ǵalymdardyń tabysy qandaı
ASTANA. QazAqparat - QR BǴM Ǵylym komıtetiniń tóraǵasy Bolatbek Ábdirasylov Qazaqstandaǵy ǵalymdardyń tabysy týraly suraqqa jaýap berdi, dep habarlaıdy «QazAqparat» HAA tilshisi.
«Ǵalymdardyń tabysy ózi utyp alǵan jobalarǵa baılanysty bolady. Demek, ol shynynda da, ozyq zertteý jumystaryn júrgizip, jobalardy utyp, qosymsha zertteý jumystaryna atsalyssa - onyń aılyǵy álbette joǵary bolady. Demek, bári de ǵalymdardyń biliktiligine baılanysty. Tabysy ájeptáýir ǵalymdar barshylyq. Olar ár túrli quraý nemese qurastyrý jumystaryna aralasa otyryp, óndiriske de atsalysa alady. Máselen, Shyǵys Qazaqstanda qazirgi ýaqytta medıtsınada qoldanylatyn protezderge arnalǵan jańa qorytpa jasaý boıynsha iri joba júzege asyrylyp jatyr. Onda qazir bıznes te, memleket te aqsha salýda. Álbette, onda jumys atqaryp jatqan ǵalymdar jaqsy tabys tabady», - deıdi Bolatbek Ábdirasylov.
Sonymen birge, Ǵylym komıtetiniń tóraǵasy qazirgi ýaqytta elimizdegi ǵalymdardyń aılyǵy shamamen qansha ekenin aıtyp berdi.
«Qazaqstandaǵy ǵalymdardyń tabysy aıyna shamamen 160-180 myń teńge bolady. Demek, aıtarlyqtaı kóp emes. Bul somadan az jáne kóp alatyndar da bar», - deıdi ol.
Buǵan qosa, Bolatbek Ábdirasylov qazaqstandyq ǵalymdar sheteldik áriptesterimen salystyrǵanda shamamen qansha aılyq alýy kerektigi jóninde suraqqa jaýap berdi.
«Bári de aınalyp kelgende jalpy ishki ónimge baılanysty. JІÓ-niń mólsherine qaraı ár elde aılyq ár túrli. Máselen, Qazaqstan men AQSh ǵalymdarynyń aılyǵyn salystyrý óte qıyn. Ómir sapasy men azyq-túlik sebeti ártúrli degendeı... Sondyqtan, ǵalym kóp tabys tabý úshin aǵylshyn tilin meńgerip, ár túrli halyqaralyq konferentsııalarǵa, sharalarǵa aralasýy kerek», - dep túıdi Bolatbek Ábdirasylov.
