Qazaqstanda ǵalymdardy áleýmettik qoldaýǵa arnalǵan qujat qabyldandy
Qujat ǵylymı, ǵylymı-tehnıkalyq saladaǵy zańnamany jetildirýge jáne onyń nátıjelerin kommertsııalandyrýdy ońtaılandyrýǵa baǵyttalǵan.
«Zań jobasyn barlyq deńgeıde tolyq qaraý – engizilgen quqyqtyq erejeler men normalardyń negizdiligin, búgingi kúnniń qajettiligine jaýap beretindigin kórsetti. Atap aıtqanda, Bıýdjet kodeksinde ǵylymı, ǵylymı-tehnıkalyq qyzmet nátıjelerin kommertsııalandyrý boıynsha bıýdjet baǵyttary naqtylandy. «Halyq densaýlyǵy jáne densaýlyq saqtaý júıesi týraly» QR Kodeksinde adam aǵzalaryn transplantatsııa jasaýǵa qatysty normalar jetildirildi. Zań jobasy birinshi oqylymda qaralǵannan keıin komıtet otyrysynda jan-jaqty zerdelendi. Qosymsha eskertýler men usynystar kelip túsken joq», - dedi Senat depýtaty Baqytjan Jumaǵulov.
Osy Zańǵa qatysty Senat tóraǵasy Máýlen Áshimbaev pikir bildirdi.
«Qabyldanǵan zań ǵylym salasynda sybaılas jemqorlyq táýekelderin azaıtýǵa arnalǵan qosymsha quqyqtyq negizder qalyptastyrady. Ǵylymı jáne ǵylymı-tehnıkalyq qyzmet nátıjelerin kommertsııalandyrýdyń jáne barlyq ǵylymı-zertteý jumysyn qarjylandyrýdyń ashyqtyǵyn qamtamasyz etedi. Sonymen qatar ulttyq ǵylymı keńester men Ulttyq memlekettik ǵylymı-tehnıkalyq saraptama ortalyǵynyń quziretteri naqtylanady. Ǵylym men tehnıkany damytýǵa úles qosqan ǵalymdardy áleýmettik qoldaý men kótermeleý de kózdelip otyr. Osy maqsatpen jyl saıynǵy «Úzdik ǵylymı qyzmetker» syılyǵyn berý qarastyrylǵan. Jalpy, bul zań elimizde ǵylym salasyn damytýǵa óziniń úlesin qosady dep senemiz. Sondaı-aq, zańda memlekettik bilim berý mekemeleriniń birinshi basshylarynyń rotatsııasy qarastyrylǵan. Ol Bilim jáne ǵylym mınıstrligi belgilegen tártippen júrgiziledi», – dedi M. Áshimbaev.
