Qazaqstanda ǵalymdar kómegimen alǵash ret radıatsııalyq modıfıkatsııalanǵan kabelder shyǵarylady

ASTANA. QazAqparat – Qazaqstanda alǵash ret radıatsııalyq modıfıkatsııalanǵan kabelder shyǵaryla bastaıdy. Bul týraly Ǵylym jáne joǵary bilim mınıstrliginen málim etti, dep habarlaıdy QazAqparat.

Radıatsııalyq-modıfıkatsııalanǵan oqshaýlaý qabaty bar munaı-sýasty jáne fotovoltaıkalyq kabelderdiń alǵashqy qazaqstandyq óndirisin L.N. Gýmılev atyndaǵy Eýrazııa ulttyq ýnıversıteti janyndaǵy «ıAdrolyq tehnologııalar parki» AQ óndirýshilermen birlese shyǵarmaq.

Ǵalymdar bul ónimdi shyǵarýdyń jańa tehnologııasyn ázirlep, qoldaný qasıetterin jaqsartty. Onyń basty artyqshylyǵy – joǵary temperatýraǵa tózimdi.

Radıatsııalyq modıfıkatsııalanǵan oqshaýlaǵysh qabaty bar munaı-sýasty jáne fotovoltaıkalyq kabel paıdaly qazbalardy jáne balamaly energııa kózderin óndirýge arnalǵan.

Óndiris ádisi elimizde ázirge qoldanylmaıdy.

«Kabeldik-ótkizgish ónimderin jasaıtyn jergilikti óndirýshiler tek oqshaýlaǵysh qabatty peroksıdti biriktirý ádisin qoldanady. Biz «Qazelektromash» JShS-men birlesip, Qazaqstanda birinshi bolyp radıatsııalyq-modıfıkatsııalanǵan oqshaýlaý qabaty bar kabeldik ónimniń munaı-sýasty jáne fotovoltaıkalyq túrin shyǵaramyz. Bul oqshaýlaǵysh polımerdegi gel-fraktsııanyń quramyn arttyrady jáne kabel-ótkizgish ónimderiniń fızıkalyq-mehanıkalyq sıpattamalaryn - ystyqqa tózimdilikti (teris jáne oń temperatýralarǵa), agressıvti ortaǵa tózimdilikti (siltili, qyshqyldyq orta) jáne radıatsııaǵa tózimdilikti jaqsartýǵa múmkindik beredi», - dep atap ótti ıAdrolyq tehnologııalar parkiniń ınjener-fızıgi, joba jetekshisi Azat Nurqasymov.

EUÝ ǵalymdary ǵylymı jobany kommertsııalandyrýdy josparlap otyr. Óndiristi 2023 jyldyń І jartyjyldyǵynda iske qosý kózdelgen.

Foto: enu.kz