Qazaqstanda ǵalymdardyń jalaqysy kóteriledi – mınıstrlik
ASTANA. KAZINFORM – Ǵylym jáne joǵary bilim mınıstrligi elimizdegi ǵalymdardyń eńbegine aqy tóleý júıesin jańartýdy josparlap otyr. Tıisti qujat jobasy «Ashyq NQA» portalynda jarııalandy.
Jańa erejege saı, granttyq jáne baǵdarlamalyq-nysanaly qarjylandyrý (BNQ) jobalarynda isteıtin mamandardyń laýazymdyq aılyǵyn esepteıtin koeffıtsıentter kóteriledi. Bul ǵalymdardyń tabysyn shamamen 25%-ǵa arttyrady.
Endigi esep boıynsha:
Jas maman: Tájirıbesi joq kishi ǵylymı qyzmetkerdiń jalaqysy (qosymsha ústemelerdi eseptemegende) 432,2 myń teńgeni quraıdy.
Tájirıbeli ǵalym: 25 jyldan astam eńbek ótili bar professor nemese bas ǵylymı qyzmetker 1,4 mln teńgege jýyq (1 396,9 myń tg) jalaqy ala alady.
Ǵalymdardyń tek eńbek ótiline ǵana emes, nátıjelerine de basymdyq berilmek. Endi ǵalymnyń belsendiligine qaraı 47,5 myńnan 522,5 myń teńgege deıin qosymsha aqy tólenýi múmkin.
Ol bes parametr boıynsha esepteledi:
keıingi 5 jylda jarııalanǵan maqalalar, monografııalar jáne qorǵaý qujattary;
keıingi 5 jylda joǵary oqý oryndarynda keminde bir nemese birneshe pánnen dáris berý (jalpy kólemi 3 kredıtten kem emes);
keıingi 5 jylda Qazaqstan Respýblıkasynda fılosofııa doktory (PhD) nemese beıini boıynsha doktor dárejesin alǵan kadrlardy daıarlaý;
keıingi 5 jylda ǵylymı jáne ǵylymı-tehnıkalyq qyzmet nátıjelerin óndiriske engizý boıynsha rastalǵan kórsetkishter.
Bul túzetýler Joǵary aýdıtorlyq palatanyń usynysymen, ǵalymdardy áleýmettik jaǵynan qorǵaý jáne ǵylym salasynyń bedelin arttyrý maqsatynda ázirlendi.
Qujat qazirgi ýaqytta qoǵamdyq talqylaýǵa shyǵarylǵan. Azamattar pikirlerin 2026 jyldyń 16 aqpanyna deıin bildire alady.
Aıta keteıik, Jańa Konstıtýtsııa jobasynyń mátini respýblıkalyq BAQ-ta jarııalanady.