Qazaqstanda ǵalamtordy paıdalanýshylar sany 4,3 mıllıon adamǵa jetti
ALMATY. 30 jeltoqsan. QazAqparat /Erlik Erjanuly/ - Qazaqstanda ǵalamtordy paıdalanýshylar sany - 4,5 mıllıon adamǵa jetti. Bul telekommýnıkatsııa men aqparattyq tehnologııa salasynda mamandanǵan ICT-Marketing táýelsiz zertteý kompanııasynyń qarasha aıynda jyl saıynǵy ǵalamtor aýdıtorııasyna júrgizilgen zertteý qorytyndysynda anyqtalyp otyr.
Qazaqstanda ǵalamtordy paıdalanýshylar el turǵyndarynyń 26,5 paıyzyn quraıdy.
2009 jyldyń jeltoqsany men 2010 jyldyń jeltoqsany arasynda ǵalamtor aýdıtorııasy 30 paıyzdan astam ósken. Qala turǵyndarynyń 16 jastan asqan 41 paıyzy, al aýyl turǵyndarynyń 19 paıyzy ǵalamtordy qoldanady. Sondaı-aq olardyń 94 paıyzy ǵalamtorǵa aıyna birneshe márte shyǵatyny málim bolyp otyr.
Ǵalamtordy qoldanýshylardyń jas erekshiligi ártúrli. Máselen 16-men 24 jastyń aralyǵyndaǵylardyń úlesi 70 myńnan astam turǵyny bar qalalarda 66 paıyzdy qurap otyr. Olardan eresekter de qalyspaı keledi. 25-44 jastaǵylardyń - 52 paıyzy, 45-54 jastaǵylardyń - 35 paıyzy, al 55 jastan joǵarǵylardyń úlesi 10 paıyzdy quraýda.
Saýalnama qorytyndysyna qaraǵanda olar ǵalamtorǵa negizinen kompıýter nemese noýtbýkten shyǵady. 70 myńnan astam turǵyny bar qala turǵyndarynyń 12 paıyzy ınternet-qyzmetti uıaly telefonnan GPRS/WAP arqyly paıdalanady. Olardyń arasynda on adamnyń jeteýi ǵalamtorǵa uıaly telefonmen qatar úıdegi nemese jumystaǵy kompıýterinen de shyǵatynyn aıtyp otyr.
Ǵalamtordy kún saıyn paıdalanatyn eresekter bıyl qalalarda 47 paıyzdy qurady. Byltyr olardyń úlesi 42 paıyz bolǵan. Al ınternetke aptasyna keminde bir ret shyǵatyndar aǵymdaǵy jyly 79-dan 84 paıyzǵa deıin ósken. Qazaqstandyqtardyń ǵalamtordy kóbine-kóp elektrondyq poshta almasýǵa, mýzyka men beınelerdi júkteýge jáne áleýmettik jelilerde tildesýge paıdalanady. Byltyr qalalyq otbasylardyń 47 paıyzynyń úılerinde kompıýter bolsa, bıyl ol 55 paıyzǵa óskeni baıqalady. Al noýtbýgy bar otbasylar 7-den 12 paıyzǵa jetken. Olardyń ǵalamtorǵa qosylý kórsetkishi kompıýterlerde 26-dan 33 paıyzǵa deıin ósip otyr.
