Qazaqstanda fýtzaldan stýdentter arasyndaǵy Álem chempıonaty ótedi
ALMATY. QazAqparat - Bıyl 19-26 tamyz aralyǵynda Almaty qalasynda stýdentter arasynda fýtzaldan Álem chempıonaty ótedi, dep habarlaıdy QazAqparat QR Bilim jáne ǵylym mınıstrligine silteme jasap.
Qazaqstan stýdentter arasyndaǵy fýtzaldan 2018 jylǵy Álem chempıonatyn ótkizý quqyǵyn 2015 jyly qazan aıynda jeńip alǵan bolatyn.
Atalmysh baıraqty doda TMD elderi aýmaǵynda alǵash ret ótkiziletin bolady. Oǵan álemdegi jıyrmadan astam eń myqty stýdenttik quramalar qatysatyny kútiledi. Sondaı-aq kóptegen halyqaralyq jankúıerler men eriktiler keletini josparlanǵan.
Uıymdastyrýshylar - Qazaqstan Respýblıkasynyń Stýdenttik sport federatsııasy jáne Ulttyq stýdenttik lıgasy.
Halyqaralyq stýdenttik sport federatsııasy (FISU), QR Stýdenttik sport federatsııasy jáne Ulttyq stýdenttik lıga arasynda qol qoıylǵan kelisimge sáıkes, stýdentter arasyndaǵy fýtzaldan Álem chempıonatyn 19-26 tamyz aralyǵynda ótkizý aıqyndalǵan.
Sonymen qatar uıymdastyrý komıtetiniń quramyna QR Bilim jáne ǵylym mınıstrligi, QR Mádenıet jáne sport mınıstrligi jáne Almaty qalasynyń ákimdigi kirip otyr.
Atap óterligi, 2014 jyly QR Bilim jáne ǵylym mınıstrliginiń bastamasymen qurylǵan Ulttyq stýdenttik lıgasynyń negizgi maqsaty jastar arasynda salaýatty ómir saltyn nasıhattaý bolyp tabylady. Qazirgi ýaqytta Ulttyq stýdenttik lıga Qazaqstannyń barlyq joǵary oqý oryndar men kolledjderdi biriktire otyryp, jastardy salaýatty ómir súrýge shaqyrady.
